-- «РИК Автор» АО Ньурбатааҕы филиала Үөһээ Бүлүү улууһугар «Бүлүү» федеральнай суол 660-670 км-гар, ол аата Чаллыртан Хороҕо диэри учаастакка үлэлиибит, — диир Сергей Валерьевич. – Икки сылы быһа уу-хаар буолан айгыраабыт учаастакка үлэлииргэ аукциоҥҥа кыттан кыайбыппыт. Быйыл 2,7 км оҥоробут. 80-ча тыһ. кубометр буор, 9000-тан тахса кубометр кумах-гравий булкааһа, 4000 туонна щебень уонна 1000 туонна цемент кэллэ. Онон матырыйаалбытын барытын аҕаллыбыт.
Муус устар 10 к. бастаан турба уһатыытын, өрөмүөнүн үлэтиттэн саҕалаатыбыт. Бу нэдиэлэҕэ суолу үрдэтэн, оҥорон кутан киирэн барыахпыт. Балаҕан ыйыгар ити эппит үлэбитин бүтэриэхтээхпит. Суол бастакы араҥата – буор уонна кумах. Иккис араҥата – цементогрунт, ол аата буор кумах-гравий булкааһын кытта цеменнэнэн, «тымныы ресайлклерынан» обработкаланан цементогрунт буолуохтаах. Суол бүрүөһүнэ хайыр таас-кумах-гравий булкааһа буолар.
Итини таһынан Ньурба филиалыттан 20-тэн тахса киһи Ленскэй улууһугар үлэлии сылдьаллар. Былырыын аукциону кыайаммыт, үлэбитин саҕалаабыппыт. Ленскэйгэ Уһук Илиҥҥэ саамай улахан кыамталаах «Новоленскэй» теплоэлектростанция тутулла турар. Кыамтата — 550 мегаВатт. Бу ТЭС-кэ биһиги40 км усталаах технологическай суоллары оҥоробут. Быйыл сэтинньигэ бүтэрэн хамыыһыйаҕа туттарыахтаахпыт.
Технологическай суол сирин болотуната – «скальный грунт большесорт», онтон кумах-гравий булкааһа уонна 3 араҥа хайыр таас буолар. 2 муоста оҥоһуллар, 20-тэн тахса ууну аһардар турба түһэриллэр. Ньиэп уонна гаас турбалара ааһар миэстэлэригэр суолу кытта ыпсыыларга футлярдар оҥоһуллаллар. Онон үлэтэ элбэх. 1 мөл. кэриҥэ кубометр араас матырыйаал кутуллуохтаах. Билигин аҥарын кэриҥин кутан олоробут, хаалбытын күһүҥҥэ диэри кутан, тэҥнээн-чиҥэтэн бүтэриэхтээхпит.
Сонун төрдө уонна хаартыска: "Ньурба уоттара", Геннадий АНТОНОВ
-
0
-
0
-
0
-
0
-
0
-
0
