Бэстибээл Ньурба судаарыстыбаннай кѳhѳ сылдьар драматическай тыйаатыр сыанатыгар ыытыллыаҕа. Үтүѳ үгэhинэн куорат киин уулуссатынан тыйаатыр кэлэктииптэрин чаҕылхай кѳстүүлээх сэлэлээн хаамыыларын олохтоохтор сэргээн кѳрүѳхтэрэ.
СѲ култуураҕа уонна духуобунай сайдыыга миниистирэ Юрий Куприянов «САТА-2023» тыйаатыр бэстибээлин туhунан маннык эттэ:
- Быйылгы 57-с тыйаатыр сезона Ньурба тыйаатырыгар ураты буолла. Кинилэр бу сылтан саҕалаан, саҥа сыанаҕа толору кыахтарын ууран туран үлэлииллэр. Ааспыт 2022 сыллаахха, Саха АССР 100 сыла туолбут сылыгар, «Култуура» национальнай бырайыак чэрчитинэн биhиги Ньурбаҕа тыйаатыр күүтүүлээх саҥа дьиэтин үлэҕэ киллэрбиппит. Тыйаатыр аныгы саҥа дьиэтэ «САТА» тыйаатыр бэстибээлин географиятын кэҥэтэр, ордук уустук туруоруулардаах кэлэктииптэри ыҥырар кыаҕы биэрдэ.
«САТА -2023» бэстибээл тиэмэтэ — «Үгэстэн саҥаны айыыга диэри» («От традиции до новаторства»).
Бэстибээлгэ ѳрѳспүүбүлүкэ бары тыйаатырдара, итиэннэ Казахстантан ыалдьыттар — Акмолинскай уобаластааҕы Нуучча драматическай тыйаатыра кыттыахтара. Казахстан тыйаатыра Н. Беленицкая «Письма к папеньке» моноиспэктээкили туруоруоҕа.
Тыйаатыры таптааччылар СѲ А.С. Пушкин аат. Нуучча академическай тыйаатырын, Мииринэй тыйаатырын, Үүнэр кѳлүѳнэ тыйаатырын, Хотугу аҕыйах ахсааннаах норуоттар тыйаатырдарын, Куукула тыйаатырын, Ньурба тыйаатырын, Дьокуускайдааҕы култуура уонна ускуустуба колледжын иhинэн үлэлиир «Күн Ѳркѳн» ыччат тыйаатырын туруорууларын кѳрүѳхтэрэ.
Куонкурус бырагырааматыгар АГИКИ устудьуоннара кыттыахтара.
Санаттахха, бастакы «САТА» ѳрѳспүүбүлүкэтээҕи тыйаатыр бэстибээлэ аан бастаан 1993 сыллаахха ыытыллыбыта. Отут сыл устата бэстибээл 11 тѳгүл буолбут. «САТА» бэстибээл РФ тыйаатыр диэйэтэллэрин Сойууhун национальнай тыйаатырдар кабинеттарын ыытар бэстибээллэрин реестрыгар киирбитэ.
-
0
-
0
-
0
-
0
-
0
-
0
