Үбүлүөйдээх бэстибээл режиссерскай-туруорар бөлөҕүн иннигэр «Өрөгөй» успуорт уораҕайыгар тэрээһин сүрүн былаһааккатын бэлэмниир сорук турар. Пресс-кэнпириэнсийэҕэ иһитиннэрбиттэринэн, түмүктүүр шоу-көрдөрүүгэ 500-тэн тахса киһи, ол иһигэр 450 араас хайысхалаах артыыс кыттыаҕа, сыанаҕа 20 үҥкүү кэлэктиибэ тахсыаҕа.
Тэрийээччилэр дойду уонна саха биллэр-көстөр толорооччуларын айымньыларыттан дьүөрэлэммит муусыканан доҕуһуолланар кэрэхсэбиллээх видеокөстүүлэргэ эрэнэллэр.
«Биһиги бэстибээл сабыллыытын сиэрин-туомун үһүс сылбытын бэлэмниибит уонна көрөөччүлэри бу да сырыыга сөхтөрөр санаалаахпыт. Тиэхиньиичэскэй өттүн оҥорорго уһун кэм баранна. Маныаха, режиссерскай-туруорар бөлөҕү кытта ыкса сибээстээхтик үлэлэһэбит. Быйыл ураты болҕомтобутун патриотизмҥа уурабыт. Кулун тутар 22 күнүгэр барыгытын күүтэбит!», - диэн бэстибээл түмүктүүр тэрээһинин сүрүн режиссера Михаил Степанов эттэ.
Этиллибитин курдук, шоу тиэхиньиичэскэй тутулугар ураты болҕомто ууруллар. Былаһаакканы бэлэмнииргэ бырамыысыланнай альпинистар кытталлар. Кинилэр «Өрөгөй» уораҕайын үрдүн анал уоту тэйитэр болотунанан тардыахтара. Бу визуальнай хартыынаны эбии кэҥэтиэ уонна кэрэхсибиллээх оҥоруо. Шоу туруоруутун тыыннаах муусуканан Павел Васьковскай салайар В. А. Босиков аатынан муусука үрдүкү оскуолатын көҥүл симфоническай оркестра доҕуһуоллуоҕа.
Сүрүн хореограф Вера Яковлева, сүрүн режиссер Михаил Степанов уонна видеорежиссер Сергей Зверев көрөөччүнү сөхтөрөр, умнуллубат өйдөбүлү хаалларар санаалаахтар, маны ситиһээри айымньылаахтык алтыһаллар, кыһамньылаахтык үлэлииллэр.
Вера Яковлева этэринэн, бэлэмнэнии үлэтэ балаҕан ыйыттан саҕаламмыт. «Биһиги өрөспүүбүлүкэбитигэр үгүс талааннаах вокалистар уонна артыыстар бааллар. Онон көрөөччүлэргэ анаан Сахабыт Сирэ талааннарынан төһө баайын көрдөрөр олус интэриэһинэй бырагырааманы бэлэмнээтибит», - диэн кэпсээтэ сүрүн хореограф.
Тэрээһиҥҥэ үрдүк сололоох ыалдьыттар, ол иһигэр федеральнай кэмитиэттэр салайааччылара уонна биллэр спортсменнар кыттыахтара. Дойду араас муннуктарыттан биллэр-көстөр дьон мустуохтара. Холобура, Росмолодежтан Григорий Гуров, «Бастакылар хамсааһыннарыттан» Артур Орлов, «Күөх патрултан» Андрей Нагибин. Маны таһынан, Арассыыйа Дьоруойдара, олимпийскай чөмпүйүөннэр, байыаннай кэрэспэдьиэннэр уонна да атын экспертэр бэйэлэрин уопуттарын үллэстиэхтэрэ. Кинилэр устуоруйаны оҥорор дьайыылары кэпсиэхтэрэ уонна эдэр дьон ыйытыыларыгар хоруйдуохтара. Бэстибээлгэ Сергей Лукьяненко, Максим Фадеев, Петр Лундстрем о.д.а. суруйааччылар, режиссердар кэлиэхтэрэ. Уонна, биллэн туран, күлүүтэ-көрө суох ааһыа суоҕа. Ол курдук, сыанаҕа Арассыыйа пранкердара Вован уонна Лексус тахсан бэстибээл кыттыылаахтарын сэргэхситиэхтэрэ.
«Муус Устар» бэстибээл Саха Сиригэр 2021 сылтан, быйыл бэһис төгүлүн кулун тутар 17-с күнүттэн 22-с күнүгэр диэри ыытыллар. Бэстибээли генеральнай спонсор «Эльга» хампаанна өйөбүлүнэн Саха Өрөспүүбүлүкэтин Бырабыыталыстыбата тэрийэр. Бу киэҥ хабааннаах тэрээһин өрөспүүбүлүкэ эдэр талааннарын булууга, өйөөһүҥҥэ уонна киэҥ эйгэҕэ таһаарыыга туһуланар.
Антонина НЕУСТРОЕВА
Хаартыскалар: муус-устар.рф
-
1
-
0
-
0
-
0
-
0
-
0
