Ол кэмҥэ Таилаҥҥа, омуннаан эттэххэ, хас хардыыҥ ахсын сахалары көрсөр курдугуҥ. Оччолорго сынньалаҥ кыраныысса таһыгар эрэ баарын курдук саныырбыт.
Оттон билигин доллар да ыараан, санкция да элбээн, пандемия да бүрүүкээн, итиэннэ, саамай кылаабынайа, бырабыыталыстыба дойду иһинээҕи туризмы күүскэ өйөөн эрэр буолан, Хара муоранан, Байкалынан, Алтайынан, Кавкаһынан дьон сынньанара үксээтэ.
Маныаха 2020 сыллаахха туристическай кешбэк диэн киирбитэ оруолу оонньоото. Ол курдук, Арассыыйа иһигэр сынньаммыккын МИР каартанан төлөөбүт буоллаххына, 20 бырыһыаныҥ төннөн кэлэр.
Аны туран, Уһук Илиҥҥэ сынньаннаххына, ол 20 %-ыҥ өссө икки төгүл улаатан төннөр буолла. Холобура, урут 200 тыһыынчаны да төлөөбүт буоллаххына, муҥутаан 20 000 солк. эрэ төнүннэрэллэрэ. Оттон билигин, холобур, ол 20 тыһ. солкуобай оннугар 40 тыһыынчаны ылар кыахтанаҕын.
Өссө биир өйүүр миэрэ -- кешбэк бырагырааматынан оҕо лааҕырын путевкатын 50 %-ын төнүннэрии. Саха Сиригэр оннук кешбэктээх 15 лааҕыр баар. Ону саха-отдых-детей.рф, оттон соҕурууҥҥу лааҕырдары мирпутешествий.рф киирэн көрүҥ.
Бэс ыйын 10 күнүгэр РФ Бырабыыталыстыбатын Бэрэссэдээтэлэ Михаил Мишустин Туризм аан дойдутааҕы тэрилтэтиттэн (Всемирная туристская организация) Арассыыйа тахсарын туһунан дьаһалга илии баттаатта.
Бу саас Латвия, Словения, Польша уонна Гватемала биһигини ити тэрилтэттэн таһаарарга тыл көтөхпүттэрэ. Биллэн турар, ол Украинаҕа буола турар байыаннай дьайыылартан сылтаан.
ВТО -- көннөрү имиджевай эрэ тэрилтэ. “Биһиги эмиэ онно баарбыт” дииргэ эрэ суолталаах. Оттон туризм сайдыытыгар туох да туһата, көдьүүһэ суох. Онон итинтэн тахсан, Арассыыйа тугу да сүүйтэрбэт, сүтэрбэт. Этэргэ дылы: “Наадалаах этилэрэ”, -- диибит уонна бэйэбит ис туризмытын өйүүбүт, сайыннарабыт.
-
3
-
0
-
0
-
0
-
0
-
0
