Ыччат лиидэринэн Нарыйа Ивановна Докторова ананан үлэтин саҕалаата. Эдэр ийэлэр түмсүүлэрин Татьяна Егоровна Иванова салайар. "Көмүс күһүн" дьаарбаҥкаҕа эдэр ийэлэргэ анаммыт куонкуруска түөлбэлэринэн кыттыбыттара.
Ыччаттар бөһүөлэккэ олорор саастаах дьоҥҥо куруутун көмөлөһөллөр. Ол курдук, бэтэрээн учуутал Марфа Петровна Харитоноваҕа биир бырысыап мас киллэттэрбитин эдэр дьон хайыттылар, кыргыттар саһааннаатылар.
Марфа Петровна итии чэйинэн, сылаас алаадьынан үөрэ-көтө чэйдэттэ. Үлэлэрин бүтэрэн, салгыы Анисия Даниловна, Иннокентий Дмитриевич Скрябиннарга эмиэ оттук мастарын хайытан, саһааннаан кэбистилэр.
Бу субуотунньукка олохтоох дьаһалта үлэһиттэрэ, бааһынай хаһаайыстыбалаах уолаттар, ыччаттар кытыннылар.
Дьаһалтаҕа баһылык солбуйааччытынан 2017 сылтан сүрдээх үчүгэйдик үлэлээбит Дмитрий Юрьевич Иванов бэйэтин төрөөбүт дойдутугар, Ньурба улууһун Сүлэ нэһилиэгэр, баһылыгынан быыбарданан үлэлии барда. Оттон биһиэхэ бэйэбит ыччаппыт Иван Егорович Мохначевскай, Сунтаар Кэмпэндээйитигэр баһылык солбуйааччытынан үлэлээн баран, аны дойдутугар ананан кэллэ.
Эдэр үлэһиттэргэ ситиһиилэри баҕарабыт. Нэһилиэк ыччата өрүү маннык үтүө санаалаах, түмсүүлээх, чөл олохтоох буолалларыгар бөһүөлэк кырдьаҕастара баҕа санааларын тиэртилэр.
Мария Захарова,
Балыктаах, Мэҥэ Хаҥалас
-
1
-
0
-
0
-
0
-
0
-
0
