Өрөспүүбүлүкэ суруналыыстарын сойууһун бэрэссэдээтэлэ Олег Марков сыллааҕы үлэ былаанын сиһилии билиһиннэрдэ. Ол курдук, бэс ыйыгар суруналыыстар үбүлүөйдээх ыһыахтара ыытыллыа. Сахабыт Сиригэр 208 сонуну киэҥник тарҕатар сириэстибэ үлэлиир. Суруналыыстар сойуустара 1000-тан тахса чилиэннээх. Бу дойду үрдүнэн биир саамай үрдүк көрдөрүү буолар.
Сойуус бэрэссэдээтэлин солбуйааччы Галина Бочкарева кулун тутар 16 күнүгэр Саха Сиригэр суруналыыстар сойуустара тэриллибитэ 65 сыла буоларынан эҕэрдэлээтэ. Маны этэн туран, дойду уонна эрэгийиэн суруналыыстарын сойуустарын наҕараадаларын билиһиннэрдэ уонна идэлээхтэр куонкурустарын туһанан кэпсээтэ.
Мунньах ыҥырыылаах ыалдьыта, Арассыыйа суруналыыстарын Сойууһун юридическэй салаатын салайааччыта Анна Белозерова суруналыыстар тэрилтэлэрин үлэтин сүрүннүүр нуормалыыр быраап аахталарын сырдатта.
Сэминээр чэрчитинэн «Саха» НКИХ интэриниэт таһаарыыларыгар сулууспатын салайааччыта Антон Васильев куйаар ситимигэр, саайка, социальнай ситимнэргэ үлэни хайдах ыытары билиһиннэриэ. Өрөспүүбүлүкэ араас муннугуттан кэлбит суруналыыстар үлэлэрин уопутун атастастаһыахтара. Түмүккэ сэминээр кыттыылаахтара Саха араадьыйатын уонна тэлэбидиэнньэтин устуоруйатын түмэлигэр сылдьыахтара.
Галина МАТВЕЕВА
-
0
-
0
-
0
-
0
-
0
-
0
