Тааттаҕа үлэни улууспут баһылыга Айаал Бурцев сүрүннүүр. Улуу биир дойдулаахпыт үбүлүөйүнэн тутууга сыһыаннаах улахан суолталаах былааннар ылыллыбыттара, соруктар турбуттара. Ол курдук Баайаҕаҕа 4 куойкалаах балыыһа, 4 кыбартыыралаах 2 олорор дьиэ курдук дьон олоҕор-дьаһаҕар суолталаах тутуулар. Маны таһынан Баайаҕа суола 2026-2027 сылларга Өрөспүүбүлүкэ көрүүтүгэр-истиитигэр киирэрэ былааннанар. Бу хамыыһыйалар үлэлэрэ тутуулар бары түмүктэниэхтэригэр диэри, 2026-2027 сылга дылы салҕанар.
Балаҕан ыйын 11 күнүгэр Баайаҕаҕа нэһилиэк баһылыга Александр Романов, Тааттатааҕы норуот айымньытын дириэктэрэ Гаврил Вырдылин, Мандар кыһатын салайааччыта Николай Егоров – Баайаҕыын, нэһилиэк общественноһа мустан сүбэ мунньах ыыттылар. Алтынньы 20 күнүгэр Мандар төрөөбүт түөлбэтигэр Баайаҕаҕа улахан үбүлүөйүнэй тэрээһиҥҥэ бэлэмнэнии үлэтин тула кэпсэттилэр. Үбүлүөйү көрсө Баайаҕаҕа Кириҥэ балаҕанын моһуонунан дьон-сэргэ мустар, түмсэр, тэрээһин ыытар балаҕан тутуута түмүктэнэн эрэр.
“Бу балаҕан XVII—XVIII үйэҕэ тутуллубут эбит. Маттаҕа Өлөксөйө туппут балаҕана буолар. Балаҕан муннуктарын икки ардыгар иккилии, эбэтэр үс тулааһыннардааҕа. Сэбэргэнэтин уонна тулааһыннарын бастарынан эт эттиир мас курдук халыҥнаах, иккилии модьу баҕайы оҕус муоһун курдук муостардаах, таҥас ыйыыр мас көхөлөрдөөх этэ.
Балаҕан оһоҕун иннинэн иккис этээс курдук долбуурдаах. Оһох инниттэн балаҕан хаҥас өттүгэр тилийэ кэтит оҥоһуулаах долбуурдаах. Маттаҕа Өлөксөйө 16 оҕолоох эбит, оҕолор бары этэҥҥэ тыыннаах хаалбыттар. Оҕо борбуйун көтөҕүөр диэри, бу иккис этээскэ сытар, утуйар эбит. Онон тымныйбакка, этэҥҥэ улааппыттар. Олор тэнийэн, Ыарҕа аҕа ууһун үөскэппиттэр, Андросовтар аймах тэнийбиттэр.” (Мандар Уус. Кэриим айан кинигэттэн, “Бичик” 2020 сыл, 54 с. )
Борис Федорович төрөөбүт күнүн көрсө Ытык Күөлгэ уонна ахсынньы ыйга Дьокуускай куоракка элбэх эбийиэги, үгүс дьону хабан дириҥ ис хоһоонноох тэрээһиннэр буолуохтара. Эһиил, 2026 сылга Баайаҕаҕа улахан иис-уус ыһыаҕа ыытыллара былааннанар.
Василена Власова, Таатта.
-
0
-
0
-
0
-
0
-
0
-
0
