Иван Луцкан, Ил Түмэн дьокутаата, СӨ Офтальмологическай клиническай балыыһатын кылаабынай бырааһа:
— Арассыыйа күнэ дойдубут былааҕын анныгар араас култууралаах норуоттары, дьону түмэр бырааһынньык, манна 180 тахса омук олорор. Тыһыынчанан сыллар анараа өттүлэригэр тэриллибит судаарыстыба үгүс тургутугу, уустук кэми ааспыта эрээри, олохтоох норуоттар күүстэринэн биир саамай күүстээх, кыахтаах дойду буолла. Арассыыйаҕа олорорбут быһыытынан, федеральнай бырайыактар көмөлөрүнэн саҥа эбийиэктэр тутуллаллар.
Биир үһүйээни кэпсиэхпин баҕарабын, сиппиир оҥорорго аҕалара уолаттарыгар хаппыт лабаалары түҥэппит: «Биирдии киһи аайы хаппыт лабааны биэрдэххэ, ону тоһутарга дөбөҥ, оттон бары бииргэ түмүстэххэ, алдьатар ыарахан», — диэн эппит.
Судаарыстыба тутулугар эмиэ биһиги бары бииргэ буоларбыт тухары күүстээхпит, биирдиилээн субъект улахан, кыахтаах дойду курдук сайдар тус-туһунан кыаҕа суох.
Федеральнай киин өйөбүлүнэн өрөспүүбүлүкэҕэ доруобуйа харыстабылыгар саҥа эбийиэктэр тутуллаллар, мэдиссиинэ көмөтүн оҥорорго биир ситим үлэлиир. Арассыыйа хас биирдии куоратыгар хаачыстыбалаах мэдиссиинэ көмөтүн кэмигэр ылыахха сөп.
Үлэм хайысхатынан үгүстүк командировкаларга сылдьабын, хас биирдии куорат уратылаах, Москуба дойду олоҕун, сайдыытын, бэлиитикэтин килбэйэр киинэ, оттон кыра куораттарга улахан мегаполис курдук кэлии-барыы дьалхаана суох, киһини уоскутар эйгэлээхтэр. Арассыыйа көмүс биһилэҕин куораттарын устун сылдьан, дойдубут сайдыытын устуоруйатын, култууратын билсиэххэ сөп. Онон биир куораты чорботор уустук соҕус. Дьокуускайга күн сирин көрбүт киһи буоларым быһыытынан, сүрэхпэр саамай чугастык тутар, таптыыр куоратым кини.
Өрөспүүбүлүкэбит киин куората өссө тупсарын туһугар быылы хаптатар, быылтан, бырдахтан босхолуур наада дии саныыбын. Ону таһынан, куораппытын көҕөрдөргө искибиэрдэри, уопсастыбаннай эйгэни оҥорор көдьүүстээх буолуо этэ. Күн бүгүн сибиэһэй салгыҥҥа хаамарга биир эрэ пааркалаахпыт, Кыайыы, өрөспүүбүлүкэ болуоссата баар. Сайсары күөл кытылыгар элбэх киһи мустар, кылгас сайыммытыгар дьон оҕолорун кытта сылдьарыгар маннык эйгэ элбээн, кэҥээн иһиэхтээх, ыскамыайкалар оҥоһуллан, куораппыт ыраас буоларын туһугар кыһаллыахтаахпыт. Суол-иис дьөлүтэ түспүтүн кэмигэр өрөмүөннээн, ардах кэнниттэн ууну оботторон истэххэ олохпут хаачыстыбата тупсан иһиэ. Оччоҕуна дьон ирбэт тоҥ үрдүгэр бастыҥ куоракка олоробут диэн саныа этилэр.
Хаартыска: Иван Луцкан архыыбыттан.
-
1
-
0
-
0
-
0
-
0
-
0
