Муниципальнай чааска норуот дьокутааттара, Аартыка улуустарын баһылыктара, биэдэмистибэлэр бэрэстэбиитэллэрэ кытыннылар. Истиини сис кэмитиэт бэрэссэдээтэлэ Елена Голомарева салайан ыытта.
Сүрүн дакылааты үп миниистирин э.т. Иван Алексеев оҥордо. Бүддьүөт туһунан дакылаат кэмитиэт ахсын туруоруллубутун быһыытынан, барытын хатылаабакка, сүрүн чахчылары аҕалабыт. Өрөспүүбүлүкэ судаарыстыбаннай бүддьүөтүн дохуота быйыл 337,3 млрд солк., 2025 с. тэҥнээтэххэ, ити 2,4 %-ынан улахан. Нолуоктан киирэр уонна нолуоктаммат дохуоттар кээмэйдэрэ 219,6 млрд солк. Олохтоох бүддьүөттэргэ бүддьүөттэр икки ардыларынааҕы трансфердар 106,3 млрд. солк. тэҥнэспиттэр, 2025 с. көрдөрүүттэн ити 9,7 %-ынан кыра. Муниципалитеттар бүддьүөтүнэн хааччыллыыларын тэҥнээһиҥҥэ 27,2 млрд солк. датаассыйа көрүллүбүт, былырыын 29,5 млрд солк эбит. Олохтоох бүддьүөттэри балаансалыыр датаассыйа 524 мөл. солк буолбут, ааспыт сылга 1,8 млрд солк эбит. Миниистир ити харчы барыта тыырылынна, онон бу хайысханан эбии үп быйыл көрүллүбэт диэтэ.
Бэс ыйын 1 күнүнээҕи туругунан, бүддьүөт дохуоттаах чааһа 43,3 %-ынан толоруллубут. Аартыка 13 улууһун бүддьүөттэрин дохуота 11,1 млрд солк. тэҥнэспит. Ити сыллааҕы былаан 51,5 %-а уонна былырыыҥҥы сыл туһааннаах кэмигэр тэҥнээтэххэ, 7,1 %-ынан ордук көрдөрүү.
Ил Дархан 410 №-дээх стратегическай ыйааҕын кэрискэтигэр киирэр «Дохуоту үрдэтии» бырайыагынан, 2023 сылтан улуустар сирдэригэр үлэлиир тэрилтэлэр туспа салааларын учуокка ылыы үлэтэ саҕаланан, 2024-2025 сс. учуокка 1 692 салаа туруоруллубут. Ол иһигэр 73 салаа тэрилтэлэр кэрискэлэрин чэрчитинэн быһаарыллыбыт, олор нолуок быһыытынан бүддьүөккэ 2 млрд солк киллэрбиттэр. Аартыка улуустарыттан манна үчүгэй көрдөрүүнү Дьааҥы, Муома ситиспиттэр.
От ыйын 1 күнүгэр диэри хас биирдии улуус үп-харчы өттүнэн чэбдигирдии былаанын ылыныахтаах, кэлэр сылтан датаассыйа онон сирдэтиллэн көрүллэр буолбут. Билиҥҥитэ чэбдигирдии былаанын Абый уонна Усуйаана эрэ улуустара киллэрбитэрин этэн туран, дакылааччыт үбү-харчыны ааҕан-суоттаан, кэмчилээн туттарга, хамнас, уоппуска харчытын, социальнай төлөбүрдэри бастатан туран хааччыйарга эттэ.
Салгыытын сиһилии "Ил Түмэн" хаһыакка ааҕыаххыт.
Хаартыска: Василий Кононов.
-
0
-
0
-
0
-
0
-
0
-
0
