Тутуу былаһааккатыгар тиийээппитин кытта барыбытыгар кааска, сэлиэт кэтэртилэр, СӨ Тырааныспарга уонна суол хаһаайыстыбатыгар миниистир Владимир Сивцев устуоруйаҕа киирэр үйэ мэҥэ тутуутун туһунан кэпсээтэ.
Кини этэринэн, икки кытылтан киирэр суолу ааҕан туран, тутуу уопсайа 14,5 км. уһуннаах, эбэни туоруур муоста 2,5 км. Үс пилоннаах вантовай күргэ киин атаҕын уһуна 284 м., Дьокуускай куорат телевышкатыттан 33 м. уһун. Күн бүгүн икки пилон атаҕар коффердамы туттулар, тутааччылар бэтэрээ уонна уҥуор биэрэккэ түөрт технологическай былаһааккаҕа үлэлииллэр.
Манна бетону оҥорор собуот баар, сыбаайа каркааһын оҥороллор, уҥа кытылга каркааһы барытын бэлэмнээн бүтэрбиттэр, массыына суола киирэригэр сирин үрдэтэн, 30 000 тахса куб.м. сиргэ кумаҕы куппуттар. Быйыл үстэн итэҕэһэ суох атаҕы туруоруохтаахтар, бастакы атах хаҥас кытылга таҥыллан турар, 5 №-дээх атах мантааска бэлэм.
Вантовай муоста систэрин арыта (пролет) 840 м., өрүс таһымыттан үрдүгэ 17,5 м., онон саас халаан уута харгыһа суох ааһыахтаах, муус иҥнибэккэ барыахтаах, суудуналар эмиэ хааччаҕа суох айанныахтара.
Икки кытылга причал оҥоһуллубут, икки коффердам өрүскэ түһэриллибит, иккис коффердамы бэс ыйын 3 күнүгэр буксирынан уҥуор таһаарбыттар. Арассыыйаҕа күргэни тутууга бу уһулуччулаах ураты түгэн, ойоҕоско турар пилон коффердамын үрдүгэ 17,5 м. эргимтэтэ (диаметра) 35 м., ыйааһына 2,2 тыһ. туонна, ол иһигэр 102 сыбаайаны үүттүөхтээхтэр. Киин пилон коффердамын үрдүгэ 17,5 м. эргимтэтэ 46 м., ыйааһына 4000 тахса туонна, 208 сыбаайаны оҥоруохтара.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
