Өрөсүүрсэнэн хааччыйар тэрилтэлэр олох-дьаһах, хомунаалынай хаһаайыстыба эбийиэктэрин саҥардыыга уонна саҥа технологиянан сэбилээһиҥҥэ көрүллэр ороскуоттары тарыыптарга эрдэттэн киллэрбиттэр, ол гынан баран, бэрэбиэркэ түмүгэ көрдөрбүтүнэн, ол үп аналынан туһаныллыбатах.
– Монопуолуйаны утары федеральнай сулууспа 2026 сыл саҕаланыаҕыттан экэниэмикэ өттүнэн туох да олоҕо суох, тарыыптар истэригэр киллэриллибит 4 миллиард солкуобай харчыны булла. Ол иннинэ, 2025 сыл иккис аҥаарыгар 6 миллиард 590 мөлүйүөн солкуобайы булбута. Оччотугар кыраасданнартан харчы ылыллыбыт эрээри, оҥоһуллар өҥө хаачыстыбата тупсарыллыбатах. Маннык быһыы-майгы долгуйууну үөскэппэт буолуон табыллыбат. Хомунаалынай инфраструктураны саҥардарга ананан хомуллубут харчы чопчу онно эрэ туһаныллыахтаах, – диэн суруйбут Вячеслав Володин.
Кини этэринэн, тарыыптарга олоҕо суох киллэриллибит 10 миллиард солкуобайтан тахса харчы эрэгийиэннэр тарыыптары оҥоруу боппуруоһугар көһүүннүк уонна эппиэтинэһэ суохтук сыһыаннаһалларын көрдөрөр. Онон, Судаарыстыбаннай Дуума быйыл кулун тутар 23 күнүгэр тарыыптары оҥорууга судаарыстыба хонтуруолун күүһүрдэр туһунан саҥа федеральнай сокуоннары ылыммыта саамай тоҕоостоох кэмигэр түбэспит. (Санатан эттэххэ, манна «Электроэньиэргийэ туһунан» федеральнай сокуоҥҥа уонна Арассыыйа Федерациятын кэккэ сокуоннарыгар уларытыылары киллэрэр туһунан» 63 №-дээх итиэннэ «Административнай быраабы кэһиилэр тустарынан Арассыыйа Федерациятын Кодексатыгар кэккэ уларытыылары киллэрэр туһунан» 73 №-дээх федеральнай сокуоннар тустарынан этиллэр).
– Монопуолуйаны утары федеральнай сулууспа тарыыптар муҥутуур таһымнарын бэйэтэ көрөрүгэр эбии боломуочуйалары биэрэр туһунан 73 №-дээх федеральнай сокуон нуормалара бу сыл муус устар ыйыттан олоххо киллэрилиннилэр. Онон, эрэгийиэннэр этиллибитин үрдүнэн кэһиилэрин көннөрбөт түбэлтэлэригэр, бу боппуруоска Монопуолуйаны утары федеральнай сулууспа бэйэтинэн орооһуоҕа. Ону таһынан, монопуолуйаны утары уорган этиилэрин хаста да төхтүрүйэн толорботох көһүүн чунуобунньуктарга административнай накаастабыл дьаһала туттуллуоҕа, оннуктар үс сылга диэри үлэлэриттэн ууратыллыахтара. Инньэ гынан, эппиэтинэһэ суох чунуобунньуктар аны аҥардас кыра ыстараабынан эрэ муҥурданыахтара суоҕа, – диэн Вячеслав Володин эбэн эттэ.
2026 сыд кулун тутар 23 күнүттэн үлэлэрин саҕалаабыт саҥа федеральнай сокуоннар олох-дьаһах, хомунаалынай хаһаайыстыба өҥөлөрүгэр тарыыптары оҥоруу эйгэтин бэрээдэктииргэ итиэннэ кыраасданнар бырааптарын араҥаччылыырга туһуламмыттар. Бу туһунан Судаарыстыбаннай Дуума саайта суруйар.
Хаартыска: Госдуума саайта.
-
0
-
0
-
0
-
0
-
0
-
0
