Пленарнай мунньах бэбиэскэтигэр биир боччумнаах миэстэни Ил Дархан Бырабыыталыстыба ааспыт 2025 сыллаах үлэтин-хамнаһын туһунан отчуота ылар. Оробуочай көрсүһүү кыттыылаахтара бу боппуруоска ураты болҕомтолорун Социальнай-экэнэмиичэскэй сайдыы стратегиятыгар киллэриллэр уларытыыларга уурдулар. Ил Дархан Социальнай-экэнэмиичэскэй сайдыы стратегията бүтүн дойду уонна өрөспүүбүлүкэ экэниэмикэлэригэр буола турар уларыйыылары учуоттаан, чугастааҕы сылларга чорботуллар соруктары уонна сайдыы хайысхаларын быһаарарга улахан суолталааҕын туһунан тоһоҕолоон бэлиэтээтэ. – Социальнай-экэнэмиичэскэй сайдыы стратегиятын уларытыы улахан боппуруос. Чуолаан бу докумуон биһиги чугастааҕы сыллардаах үлэбит былаанын чопчулуур, сүрүннүүр, быһаарар. Өрөспүүбүлүкэҕэ да, дойдуга да күн бүгүн улахан тургутуулар, уларыйыылар буола тураллар ол барыта учуоттаныахтаах, – диэтэ Айсен Николаев. Көрсүһүүгэ экэниэмикэ билиҥҥи туруга таарыйылынна. Экэниэмикэ сүрүн салааларыгар балаһыанньа төһө даҕаны туруктаах буоллар, экэниэмикэни тастан хааччахтааһын усулуобуйатыгар үлэлээн олорорбут санатылынна. Сааҥсыйа ыгыыта экспортка хайысхалаах тэрилтэлэр, логистика тиһиктэрин, үп-харчы ырычаахтарын уонна инвестиционнай бырассыастар үлэлэригэр дьайара этилиннэ. Итиэннэ ол барыта алмааһы, чоҕу, көмүһү хостуур тэрилтэлэр үлэлэригэр-хамнастарыгар итиэннэ бүддьүөккэ нолуок киириитигэр сабыдыаллыыра бэлиэтэннэ. Ону таһынан, нолуок сокуоннарыгар киллэриллэр уларытыылары уонна дьоҕус биисинэс үлэтин кытары ситимнээх боппуруостар быһаарыыны, болҕомтону эмиэ эрэйэллэрэ этилиннэ. Ураты болҕомто кыстыгы көрсө хотугу улуустарга аһы-үөлү уонна туттар табаары, таһаҕаһы тиэйиигэ-таһыыга итиэннэ эрэгийиэни оттук-эньиэргийэ өрөсүүрсэлэринэн хааччыйыыга уурулунна.
– Билигин өрөспүүбүлүкэ оттугунан-уматыгынан хааччыллан олорор. Тиэйэр-таһар үлэни кытаанах хонтуруолга тутабыт, үөскүүр боппуруостары барытын ырытабыт, онон наадалаах быһаарыылары ылынан иһиэхпит, – диэтэ Айсен Николаев.
Көрсүһүү түмүгүнэн норуот дьокутааттара Ил Түмэн пленарнай мунньаҕын чэрчитинэн өрөспүүбүлүкэ социальнай-экэнэмиичэскэй сайдыытын, бүддьүөтү толоруу, сокуоннары тупсарыы итиэннэ кыраасданнар бырааптарын араҥаччылааһын боппуруостарыгар көдьүүстээхтик үлэлииргэ бэлэмнэрин биллэрдилэр. Бу туһуан Ил Дархан уонна Бырабыыталыстыба пресс-киинэ суруйар.
Хаартыска: Андрей Сорокин.
-
0
-
0
-
0
-
0
-
0
-
0
