Иккис боппуруоһунан Ил Дархан Айсен Николаев СӨ Бырабыыталыстыбатын 2025 с. үлэтин түмүгүн таһаарар отчуоту иһитиннэрдэ. Ситэриилээх былаас үлэтин сүрүн кэрчиктэригэр, экэниэмикэ хас биирдии салааларыгар тохтоон, дойдубут маннык быыһык кэмҥэ кыайыыны ситиһэрин туһугар туох баар күүспүтүн, болҕомтобутун ууран туран үлэлиирбитин бэлиэтээтэ.
2025 судургута суох сыл ааста, онтон 2026 өссө уустук сыл үүннэ эрээри, сүрүн сорукпут дьон олоҕун хаачыстыбатын тупсарыы. Онтон олохпут уйгута тупсарын туһугар аан бастаан Аҕа дойдубут кыайарын туһугар үгүс өрүттээх көмө Анал байыаннай дьайыы кыттыылаахтарыгар, кинилэр дьиэ кэргэттэригэр тиһигин быспакка ыытыллар.
Былырыын 3,5 тыһ. тиэхиньикэни, байыаннай сулууспалаах дьону уонна кинилэр дьиэ кэргэттэрин өйүүргэ 10 млрд. 819 мөл. солк. ыыппыттар. АБДь саҕаланыаҕыттан өрөспүүбүлүкэ Аҕа дойдубутун көмүскүү сылдьар буойуннарга 4,1 млрд. солк. суумалаах тиэхиньикэни уонна туттар тэрили биэрбит, 1800 туонна гуманитарнай көмөнү тиксэрбит.
Бааһырбыт саллааттары чөлүгэр түһэрэргэ Мэдиссиинэ национальнай киинигэр, Мэдиссиинэ реаабилитациятын өрөспүүбүлүкэтээҕи киинигэр куойкалар төгүрүк суукка үлэлииллэр. «Бэс чагда» санаторийга кинилэргэ анаан стационар аһыллыбыт. Социальнай реабилитацияны тыһыынчаттан тахса АБДь кыттыылаахтара, кинилэр чугас дьонноро аастылар, төрөппүттэр санаторнай-курортнай эмтэниинэн хааччылыннылар.
Бэтэрээннэри үлэнэн хааччыйыы, бэйэ дьыалатын арыйыыга көмөлөһүү судаарыстыба тутаах соруга. Былырыын Дьарыктаах буолуу киинин нөҥүө 340 киһи үлэ булбут. Үлэ миэстэтин квотанан тыырар туһунан өрөспүүбүлүкэ сокуонугар уларыйыы киирэн, байыаннай дьайыы бэтэрээннэрэ туһунан салааҕа киирбиттэр.
Кыайыы күнүн иннинэ ыам ыйын 8 күнүгэр «Саха Сирэ – дьоруойдар дойдулара» АБДь кыттыылаахтарыгар ыытыллыбыт каадырдары бэлэмниир бырагыраама 25 бастакы выпускниктарыгар дипломнары туттарбыттар. Маннык бырагыраама салгыы эмиэ ыытыллан иһиэҕэ. Кыргыһыы хонуутугар ууну-уоту ортотунан ааспыт хорсун-хоодуот дьон өрөспүүбүлүкэни салайар үлэҕэ кыттыһыахтара.
Бааһырбыт АБДь кыттыылаахтарын дьиэ кэргэттэрин кытта социальнай хантараак түһэрсэн, муниципальнай тэриллии босхо сир учаастагынан хааччыйар. Улуустарга уонна куорат уокуругар «#МЫВМЕСТЕ» диэн анал ыстаап үлэлиир. Былырыын 6000 сайаапка киирбит, тустаахтарга дьиэ-уот, күннээҕи кыһалҕа быһаарыллыбыт.
Биһиги өрөспүүбүлүкэбит Донецкай таһыгар баар Докучаевскайга тиһигин быспакка көмөлөһөр, 2025 с. уон эбийиэккэ үлэ түмүктэммит, бэс ыйын 8 күнүгэр Оҕо уонна эдэр ыччат айар дьоҕурун сайыннарарга саҥа киини арыйбыт.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
