Социальнай гаастааһыҥҥа Уһук Илин бастакыбыт уонна дойду биэс бастыҥ эрэгийиэнин ахсааныгар киирэбит. 2021 с. гаас турбата 10 830 дьиэҕэ киирбит. 2025 с. 396 км. уһуннаах гаас ситимэ тутуллубут, биһиги өрөспүүбүлүкэбитигэр бу уһулуччулаах көрдөрүү. «Газпром» хампаанньаны кытта Саха Сирин соҕуруу эҥээригэр таас чоҕунан уонна ньиэбинэн оттуллар хочуолунайдары гаас уматыкка көһөрүү бырагыраамата ыытыллар. 2030 с. диэри гаас уматыкка Өлүөхүмэ, Ленскэй, Нерюнгри, Алдан улууһугар 67 хочуолунай көһүөхтээх.
Кирэдьиит бырыһыана өр кэмҥэ үрдүк турара, уматык сыаната ыараабыта хомунаалынай хаһаайыстыбаны салайарга стратегическай уларыйыыны ирдиир. Тарыып икки ардынааҕы араастаһыытын субсидиялааһын кээмэйэ үрдүүрүн тохтотор былааны 2025 с. ылыммыттара. Ол иһигэр нэһилиэктэргэ гаас турбатын тардыы, дьиэ-уот пуондатын оптимизациялааһын, хоту табаары тиэйии логистикатын уларытыы о.д.а. атын дьаһал киирэр.
Бу былааны олоххо киллэрии түмүгэр 679 мөл. солк. ылбыттар, чуолаан ити оптимизацияны кытта сибээстээх. Инникитин ороскуоту кыччатыы үлэтэ эмиэ салҕаныа, ол көдьүүстээх буоларын туһугар уматык көрүҥүн уларытыахтара, эниэргийэни харыстаан туттар саҥа технологияны киллэриэхтэрэ, табаары тиэйии ороскуотун аччатыахтара, олох-дьаһах, хомунаалынай хаһаайыстыбаны салайыыны төрдүттэн уларытыахтара.
Ол туһунан Ил Түмэн уон тохсус пленарнай мунньаҕар Ил Дархан Айсен Николаев СӨ Бырабыыталыстыбатын 2025 с. үлэтин түмүгүн таһаарар отчуотугар иһитиннэрдэ.
Хаартыска: ЯСИА.
-
0
-
0
-
0
-
0
-
0
-
0
