Араас сылларга холкуос-сопхуос пиэрмэлэригэр үлэлээбит-хамсаабыт кырдьаҕас ыанньыксыттар итиэннэ «Оскуола – производство – үрдүк үөрэх» дэбииһинэн салайтаран, пиэрмэҕэ иккилии-үстүү сыл үлэлээн баран, салгыы анал орто уонна үрдүк үөрэҕи бүтэрэн норуот хаһаайыстыбатын араас салааларыгар үлэлээбит, билигин бочуоттаах сынньалаҥҥа олорор үлэ бэтэрээннэрэ сайын ахсын баччаларга урут үлэлээбит-хамсаабыт сайылыктарынан сылдьаллар.
– Уһун кырыа кыһын кэнниттэн, самаан сайын салаллан, айылҕа барахсан муҥутаан тупсан турар кэмигэр, бохуот диэн ааттаан, отуттан тахса сыл сырыттыбыт. Хайахсыппыт алаастарын барытын кэрийдибит. Айылҕа барахсаҥҥа туох да кыһалҕата суох, күөх урсун устун хаамсарбыт, бу сайылыктарга ааспыт эдэр, эрчимнээх сааспытын, бииргэ үлэлээбит дьоммутун-сэргэбитин ахтан-санаан, үөрэрбит-көтөрбүт олус да кэрэ буоллаҕа! – дэһэллэр олоххо көхтөөх бэтэрээннэр.
Кинилэр кэккэлэригэр саастарын тухары Эрилик Эристиин аатынан холкуоска, онтон сопхуоска таһаарыылаахтык үлэлээбит ыанньыксыттар: Саха АССР дьахталларын алтыс сийиэһин дэлэгээтэ, үс ыҥырыыга нэһилиэк сэбиэтин дьокутаатынан, икки ыҥырыыга оройуон сэбиэтин дьокутаатынан талыллыбыт, өр сылларга ыччаттарга настаабынньыктаабыт Евдокия Саввична Назарова уонна 42 сыл үлэлээбит ыстаастаах, кэлин осеменаторынан үлэлээн биэнсийэҕэ тахсыбыт Ирина Кузьминична Софронова бааллар.
Бу туһунан биһиэхэ уопсастыбаннай кэрэспэндьиэммит Мария Герасимова кэпсээтэ.
-
9
-
1
-
0
-
0
-
0
-
0
