Хонуу- сыһыы чэчик чэмэлкэй мичээринэн киэргэннэ, кустук өҥүн дьүөрэлээн дьэргэтэ тэлгэннэ. Алааска киирдэххэ ханарыһа хаамсар хотуттардыы хантайа соҕус туттан, хамсаатаҕын ахсын ытарҕата эйэҥэлиир, хайыстаҕын ахсын киэргэллэрин хобо чуорааннара лыҥкынаһар хатыҥнар кэккэлэһэ сэлэлээн иһэллэр, оҕо саас омунун, мэнигин ыһыкта илик хахыйахтар итинэн быгыалаан, манан былтаҥнаан дьарыллан ылар эрэкэ-дьэрэкэ буолан сырсаллар, бу кэрэ көстүүнү ыһыктыбаттыы харабыллыыр, ыраахтан астына дуоһуйа одуулуур, тэҥкэ тиит барахсан хара дьайы киллэрбэттии эрэллээх эр дьоннуу халыҥ хахха буолан турар, ыраас, чэбэр буолуу чэгиэн туругун туоһута буолан бэс чагда уолаттара чэбдик салгынынан сайа тыыналлар, ыһыктыбаттыы ыкса ылсан илии- илииттэн тутуһан турар иирэ талахтар эриири- мускууру тулуктаһаллар, сиҥнибэттии силис-мутук тардаллар.
Кылгас сайын кылбар үтүөтүн, өҥүн, быйаҥын иҥэринэн торолуйа уойардыы, туругура тупсардыы түөрт түөрэм атахтаах тиэтэйэ- саарайа, өрүсүһэ үлүмнэһэр. Күөхтэн иҥэмтэлээҕин иҥэринэн, амтаннааҕын аһаан ыадаччы ыанньыйбыт, дыыдаччы топпут ыанньык ынахтар мааныланан эбии аһылыктанан, имэриллэн- томоруллан ураты болҕомтоҕо сылдьаллар, субай сүөһү субуруһа субуллан түптэ тула мустар, астына дуоһуйа кэбинэр. Дьаһаллаах хаһаайка тэлгэһэттэн тэйбэккэ, олбуоруттан да ырааппакка туттан- хаптан, бүтэрэн- оһорон уурунуулаах буолардыы, хаһаастаах аатырардыы оҕуруотун олордор, бааһынатын бэрийэр.
Хаартыска эрэдээксийэ архыыбыттан.
-
0
-
0
-
0
-
0
-
0
-
0
