Кырыктаах кыргыһыыга олохторун толук уурбут саллааттары кэриэстээн, кинилэргэ сүгүрүйэн, эйэлээх олоҕу уһансыбыттарын иһин махтанан, Арассыыйа үрдүнэн тохтобул мүнүүтэтэ биллэриллэр. Сэбиэскэй Сойуус дьоруойдарын, хорсун буойуннарын пааматынньыктарыгар сибэкки дьөрбөтүн, чүмэчини уураллар. Судаарыстыбаннай тэрилтэлэр былааҕы түһэрэллэр. Дойду үрдүнэн аралдьытар, көрү-нары көҕүлүүр тэрээһиннэр, ол иһигэр тэлэбиидэнньэҕэ уонна араадьыйаҕа тохтууллар.
Аҕа дойдуну көмүскүүр сэрии 1418 күн уонна түүн устата тохтоло суох барбыта, онно дойдубут 27 мөлүйүөн киһини сүтэрбитэ эрээри, фашисткай Германияны кыайан, ССРС-ка эрэ буолбакка, бүтүн Европаҕа эйэлээх олоҕу бэлэхтээбитэ, Гитлер сэрииһиттэрин хам батталыттан киһи-аймаҕы босхолообута.
Дьокуускайга Өктөөп 50 сылын автострадатыгар баар Кыайыы пааркатыгар бүгүн киэһэ 20 ч. өйдөбүнньүк чүмэчилэрин уматар аахсыйа ыытыллыаҕа.
Хаартыска ЯСИА.
-
0
-
0
-
0
-
0
-
0
-
0
