Андрей Находкин былырыын Өлүөнэ эбэни туоруур күргэни тутуу үлэтэ саҕаламмытын, бу саас Ил Түмэн дэлэгээссийэтэ тутуу хайдах баран иһэрин миэстэтигэр тиийэн көрбүтүн, онно бырайыагы салгыы үбүлүүргэ кэккэ кыһалҕа баара этиллибитин тириэртэ. 2026 с. былааннаммыт үлэ толору туолар кыахтаах дуо? — диэн кини ыйытта. Иккиһинэн, «Полярные авиалинии» саҥа бөртөлүөттэр кэлбиттэрин санатан туран, дьоҕус авиацияны сайыннарарга, улуустарга көтөргө эргэрбит АН-2 оннугар саҥа сөмөлүөттэри хаһан ылалларын интэриэһиргээтэ.
СӨ Өлүөнэ күргэтин тутуу дириэксийэтин салайааччытын э.т. Динара Лаврентьева 2026 с. былаан быһыытынан, өрүскэ икки коффердамы түһэриэхтээхтэрин, ол эрэн күн бүгүн эрэгийиэннээҕи бүддьүөттэн үбүлээһин ситэ оҥоһулла илигин эттэ. Ол иһин биир коффердамы түһэриэхтэрэ, иккиһин үбүлээһин кэлэрин күүтэллэр. Маны таһынан, уҥа кытылга сирин, икки причалы бэлэмниэхтэрэ.
Оттон дьоҕус авиация суудуналарын паарката, биллэн турар, эргэрдэ эрээри, дойду үрдүнэн сөмөлүөттэри саҥардыы саҥа салгын суудуналарын хаһан оҥороллоруттан, ону хаһан аҕалалларыттан тутулуктааҕа этилиннэ. АН-2 оннугар «Байкал» тииптээх көтөр аалы күүтэллэр.
«Полярные авиалинии» авиахампаанньа генеральнай дириэктэрин солбуйааччыта Василий Чин-Фю «Байкал» бырайыагынан билигин үс сөмөлүөт оҥоһуллубутун туһунан иһитиннэрдэ. Онтон биирэ тургутугу ааһар, атыныгар статистическай кэтээн көрүүнү ыыталлар, ВК-800 мотуору оҥорон, эргэ мотуору уларытыахтаахтар. Стендовай чинчийиини ыыталлар, маннык көрүҥнээх салгын суудунатыгар элбэх ыйытык үөскээбит, ол иһин сөмөлүөтү аҕалыы болдьоҕо уһаан биэрбит. Ону таһынан, АН-3 көтөр аалы өрөспүүбүлүкэ бүддьүөтүн суотугар атыыласпыттар.
Хаартыска: Ил Түмэн пресс-сулууспата.
-
0
-
0
-
0
-
0
-
1
-
1
