Саха Сириттэн 1941 с. сэриигэ 62 000 тахса киһи ыҥырыллан барбыта. Кинилэртэн 23 000 киһи эргиллэн кэлбитэ, атыттар Кыайыы туһугар сырдык тыыннарын толук уурбуттара, сорохтор сураҕа суох сүппүттэрэ. Бэл 418 кэрэ аҥаардар саа-саадах тутан, фроҥҥа барбыттара. Тыылга аччык-кураан кэмҥэ хоргуйан, тоҥон-хатан, онтон ыалдьан эмиэ элбэх киһи олохтон туораабыта.
Саха саллааттара борохуотунан, пуойаһынан бэрт ыраах айаны айаннаан, дойду тэбэр сүрэҕин Москубаны, Ленинграды көмүскээбиттэрэ, Курскай дуга, Сталинградскай кыргыһыы, Украина, Белоруссия, Прибалтика, арҕаа Европа хайысхатынан Берлиҥҥэ тиийэ фашистары эккирэтэн, өстөөҕү уйатыгар тиийэн самнарбыттара, бэл Рейхстаг эркинигэр суруктарын хаалларбыттара.
Оҕо саастарыттан бултуу үөрэммит дьон бэргэн ытааччы, хорсун артиллерист, танкист, лүөччүк буолбуттара. Дьоруойдуу быһыыларын иһин 2300 буойун араас уордьанынан уонна мэтээлинэн наҕараадаламмыттара. 24 киһи Сэбиэскэй Сойуус Дьоруойа үрдүк ааты ылбыта, 6 киһи Богдан Хмельницкай, Александр Невскай, Павел Нахимов уордьанын ылар чиэскэ тиксибиттэрэ. Сэбиэскэй Сойуус Дьоруойа Федор Охлопков бэргэн ытыынан 429 ньиэмэс саллааттарын уонна аппыһыардарын суох оҥортообута.
Айылҕа баайынан биллэр Сахабыт Сирэ сэрии кэмигэр 553 киилэ кыһыл уонна үрүҥ көмүһү, 1945 сыллааҕы сыананан 90 мөл. солк. суумалаах кылааннаах күндү түүлээҕи, 40 000 тахса туонна балыгы, 367 000 сылаас таҥас кэмпилиэгин туттаран, Кыайыы туһугар дьоһун кылаатын киллэрбитэ.
Ааптар хаартыскаҕа түһэриитэ.
-
0
-
0
-
0
-
0
-
0
-
0
