Георгий Балакшин Куоначчаан өрүһү туоруур күргэ хаһан тутулларын, Ньурба куорат аэропуорда хаһан оҥоһулларын ыйыталаста.
Онуоха Куоначчаан өрүһү туоруур күргэни тутарга бырайыактыыр үлэ бүтэн эрэрин, сотору кэминэн бырайыагын уонна симиэтэтин ылан, судаарыстыбаннай хантараагы түһэрсиэхтээхтэрин туһунан эттилэр. Оттон Ньурба аэропуордун оҥоро сатаабыттара ыраатта, федеральнай киин болдьоҕу 2027-2030 сс. көһөрбүт. Үбүлээһин кээмэйэ 4 млрд. солк.
Урут Сэбиэскэй кэм саҕана алмааһы көрдүүр Амакинкатааҕы эспэдииссийэ геологтара Ньурбаҕа олохсуйан олорон үлэлээбиттэрэ, ол иһин манна бөртөлүөт көтөр хонуута, аэропуорт баар эрээри, ардах түстэҕинэ, сөмөлүөт түһэр-көтөр балаһата илийэн, бырыы-бадараан буолан, сырыы тохтоон хаалара. Оччоҕуна дьон хаайтаран нэдиэлэнэн куоракка кыайан барбакка, хаһан суол кууруор диэри олороро, онтон федеральнай айан суола тутуллуоҕуттан, бары массыынанан сылдьаллар. Ол эрэн кыра оҕолоох ийэлэр, кырдьаҕас дьон 12-15 чаастаах уһун айаны ыарырҕатан, аспаал суоллаах аныгы аэропуорт наада диэн туруорсубуттара ыраатта. Дьиҥэр, сөмөлүөт Ньурбаттан Дьокуускайга диэри 1,5 чаас көтөн тиийэр. Аан бастаан Ньурбаҕа аэровокзал мас дьиэтэ 1951 с. тутуллубута, онтон 1979 с. таас дьиэни туппуттара ол даҕаны эргэрэн бүттэ.
Хаартыска: Мария Васильева, ЯСИА.
-
0
-
0
-
0
-
0
-
0
-
0
