Дьокутаат кыһыл көмүһү, таас чоҕу хостооһун кээмэйэ сыллата үрдээн иһэр, оттон алмаас тоҕо киирбэтэҕин токкоолосто. Кини саҥа тосхолго сурулларынан, сир баайын барытын сүргэйэн, таска таһаарыахтара, оттон айылҕабытын, олохтоох дьоммутун ким харыстыыр диэн долгуйарын биллэрдэ. Виктор Николаевич «Олонхоленд» хаһан тутуллан үлэҕэ киирэрин, тутуутун уонна үлэтин хааччыйыы ороскуота төһө буоларын ыйыталаста.
СӨ Экэниэмикэтин миниистирин бастакы солбуйааччыта Иван Елисеев кэлэр сылларга улахан инвестиционнай бырайыактар олоххо киирэн, Новоленскай ТЭС, Саха Сирин соҕуруу эҥээригэр саҥа ТЭС, Ньурбаҕа ГРЭС тутуллан, бүддьүөккэ үп-харчы киириитэ эбиллиэҕэ диэн хардарда. Кини этэринэн, кыһыл көмүһү, таас чоҕу хостооһун бырамыысыланнас сүрүн хайысхата, оттон алмааһы хостооһун эмиэ салгыы сайдыахтаах.
«Олонхоленд» судаарыстыбаннай, чааһынай партнерство быһыытынан 2020 с. саҕаламмыта, быйыл тутуллан бүтүөхтээх этэ даҕаны, баҕар 2027 с. диэри көһөн биэриэҕэ, күн бүгүн эбийиэк 80% бэлэм. «Олонхоленд» үлэтин хааччыйыы 2027-2028 сс. судаарыстыбаннай бүддьүөккэ киирбитэ, 4 млрд. солк. көрүллүбүтэ, ол иһигэр «ВИС» хампаанньа сойуомун ороскуотун төлөөһүн. Эбийиэк тутуутун сыаната 19 млрд. солк., сыл аайы төлөнүөхтээх ороскуоту аахтахха, 40 млрд. солк.», — диэтэ Иван Елисеев.
Онуоха норуот дьокутаата Виктор Федоров: «30 тыһ. кв.м. иэннээх тутуу хайдах 40 млрд. солк. буоларын, ис эркинэ көмүс дуйдаах дуо?», — диэн туоһуласта. Кини икки төгүл кыра иэннээх «Ураса молл» тутуутугар 1 млрд. солк. барбытын бэлиэтээтэ. Тутуу сыаната хайдах 40 төгүл үрдээбитин сураста. Итиниэхэ Иван Елисеев култуура үрдүкү технологиялаах ураты эбийиэгэ тутулларын санатта.
Хаартыска: Николай Борисов, ЯСИА.
-
0
-
1
-
0
-
0
-
0
-
1
