Ыһыах аһыллыытын биир дойдулаахтарын эҕэрдэлииригэр спикер Илья Егорович Винокуров өрөспүүбүлүкэ устуоруйатыгар, норуот дьылҕатыгар оруолун тоһоҕолоон бэлиэтээтэ. Аҕа дойду сэриитин саҕана, 1942 с. уот кураан туран, Намҥа эрэ буолбакка, илин эҥээринэн, Бүлүү бөлөхтөрүнэн сут буолбутугар, Илья Егорович бырабыыталыстыба бэрэссэдээтэлин солбуйааччы дуоһунастаах сылдьан, Иосиф Сталиҥҥа тиийэ приемҥа киирэн, тылын ылыннаран, улахан дьаһаллар ылыллалларын, тыа сирин дьонун хоргуйууттан, сэлликтэн быыһыыры ситиспитин, ол иһин саха норуота кини аатын умнубаттарын эттэ.
--Устуоруйа быыһык кэмнэригэр, Саха Өрөспүүбүлүкэтэ тэриллэригэр Максим Аммосов саамай улахан кылааты оҥорбута. Итинник быыһык кэмҥэ: „Саха норуота баар буолар дуу, суох буолар дуу?“ -- диэн ыйытыы турбутугар, Илья Винокуров өрөспүүбүлүкэтин салайан, саханы саха оҥорбута. Онон, намнар саха норуотугар улахан кылааттаах уонна сүдү салайааччылары үөскэтэн таһаарбыт дьон буолабыт. Ону ыччаттарбытыгар, бүттүүн саха дьонугар, Арассыыйа норуоттарыгар мэлдьи сырдата сылдьыахтаахпыт. Күндү биир дойдулаахтарым! Бүгүн сүрдээх үчүгэй алгыһы ыллыбыт. Бу алгыспыт баһа сыаланнын!
Билигин мөккүөрдэр бараллар: «Бу уустук кэмҥэ ыһыахтары ыһыахтаахпыт дуу, суох дуу?» -- диэн. Өйдөтүөм этэ: Илья Винокуров Аҕа дойду сэриитэ буола турдаҕына, 1944 с., бүттүүн өрөспүүбүлүкэ нэһилиэктэригэр ыһыахтыырга сорудах биэрэн ыһыах ыһан турардаах. 35 сыл анараа өттүгэр Бастакы Бэрэсидьиэн Михаил Николаев ыһыаҕы судаарыстыбаннай бырааһынньык быһыытынан бигэргэтэр ыйааҕы таһаарбыта. Билигин судургута суох кэм, бүддьүөппүт да боппуруоһа ыарахаттардаах, үп-харчы өттүнэн даҕаны оннук буолуох курдук. Онон мин эһигини, биир дойдулаахтарбын, эти-үүтү, оҕуруот аһын, оту-бурдугу дэлэтэр, сүөһүбүтүн-сылгыбытын энчирэппэт туһугар үлэлээн-хамсаан, кыстыкпытыгар бэлэмнэнэн, этэҥҥэ олоруоххайыҥ диэн ыҥырабын. Алгыс баһа сыаланнын, уйгу-быйаҥ тосхойдун! Уруй-туску! – диэн тылларынан эҕэрдэтин түмүктээтэ Алексей Еремеев.
Ил Түмэн пресс-сулууспатын матырыйаалынан
-
1
-
0
-
0
-
0
-
0
-
0
