Кэмпириэнсийэни Дьокуускай к. уонна Нам улууһун дьаһалталарын кыттыыларынан, РАН Сибиирдээҕи салаатын Саха сиринээҕи билим киинэ, Гуманитарнай чинчийии үнүстүүтэ Азия Хотугулуу Илинин итиэннэ Уһук Илини баһылааһыҥҥа Өлүөнэтээҕи (Дьокуускайдааҕы) остуруок оруолун туһунан ырытар соруктаах тэрийдилэр.
Алексей Еремеев киирии тылыгар бу ыйга Саха Сирэ билим эргимтэтин киинэ буолбутун, ол курдук, бэс ыйын 19-21 күннэригэр РАН президиумун уонна Саха Өрөспүүбүлүкэтин Бырабыыталыстыбатын киэҥ ыҥырыылаах холбоһуктаах сүбэ мунньахтара ыытыллыбытын эттэ.
– Бүгүҥҥү кэмпириэнсийэ миэхэ ураты суолталаах. Идэбинэн устуорукпун, Саха судаарыстыбаннай үнүбүрсүөтүн устуоруйаҕа бакылтыатыгар үөрэнэр сылларбар биһиги кыраайбыт судаарыстыба устуоруйатыгар суолтатын туһунан өйдөбүлүм төрүттэммитэ. Эһиги, кэмпириэнсийэ кыттыылаахтара, Намҥа дакылааттары истэ эрэ буолбакка, устуоруйа өйдөбүнньүктэрин билсэр соруктаах сылдьыбыккытыттан долгуйа үөрэбин. «Үрдүк Иирэ» устуоруйа-этнография комплексыгар былыргы хаһаактар остуруоктара чөлүгэр түһэриллибитин көрдүгүт, атын маннык тутуу өрөспүүбүлүкэҕэ суох. Биһиги судаарыстыбаннаспыт силиһэ дириҥ, дипломатия уонна ырааҕы өтө көрүү норуоттар дьылҕаларын быһаарбыт кэмнэриттэн саҕаланар. XVII үйэ саҕаланыытыгар, нуучча хаһаахтара Өлүөнэ орто сүнньүгэр кэлбиттэригэр, Нам баһылыга Мымах аҕа ууһун сирдьитин уонна муударай бэлиитик, стратег быһыытын устуоруйаҕа киирбитэ. Эйэ-дэмнээх кэпсэтии уонна хардарыта ытыктаһыы суверенитет итиэннэ туруктаах олох оҥкула буоларын көрдөрбүтэ. Онон, баһылык эппиэтинэстээх буолуутун уонна судаарыстыбаннай толкуй үгэстэрэ Нам сиригэр оччолортон олохсуйбута. Билигин, Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылынан, өбүгэбит нэһилиэстибэтэ ураты суолталанар. Биһиги судаарыстыбабыт муудараска, эйэҕэ, бэйэ устуоруйатыгар уонна култууратыгар харыстабыллаах сыһыаҥҥа олоҕурарын туһунан өсө төгүл санатар, өйдөтөр. Бу кэмпириэнсийэ академическай дьүүллэһии эрэ буолбакка, уруккуну кэлэр кэми кытары ситимниир далаһа буолар, дакылаакка этиллэр хас биирдии чахчы, санаа, мөккүөр устуоруйа өйдөбүллэрин харыстааһыҥҥа, судаарыстыбаннас тирэҕин бөҕөргөтүүгэ кылааты киллэрэр, – диэтэ спикер.
Кэмпириэнсийэ Хотугу сири баһылааһын устуоруйатын билим өттүнэн анаарыыга бэйэтин суолун-ииһин хаалларыаҕар эрэнэрин биллэрдэ, кэмпириэнсийэ кыттыылаахтарыгар айымньылаах үлэни, чаҕылхай арыйыылары, интэриэһинэй сэһэргэһиини баҕарда.
-
0
-
0
-
0
-
0
-
0
-
0
