Издательский дом Редакция Подписка
Погода в Якутске: . -14 oC

Бүгүн кэпсэтэр киһим Снежана Варламова -- күн күбэй ийэ, урбаанньыт, салайааччы, спортсменка, булчут.

Бүгүн кэпсэтэр киһим Снежана Варламова -- күн күбэй ийэ, урбаанньыт, салайааччы, спортсменка, булчут.

-Самаан сайын кэлбитинэн, Снежана! Бүгүн ийэ олоххо оруолун, булт умсулҕанын туһунан кэпсэтиэхпит. Бастатан туран, кимтэн кииннээххин, хантан хааннааххын сырдат.

- Мин талыы талба Таатта Ытык Күөлүгэр 1987 сыл алтынньы 20 күнүгэр төрөөбүтүм.

снежана возле реки- Төрөппүттэриҥ ордук туохха уһуйбут, олоххо бэлэмнээбит эбиттэрий?

-Ийэм Равелла Иннокентьевна, аҕам Дмитрий Николаевич Пинигиннэр-Сосиннар иккиэн учуутал идэлээхтэр. Учууталлар төрүт солото суох дьон буолаллар, ол эрээри оччотооҕу кэм ыалларын курдук, сүөһү ииттэн, оҕуруот олордон, дьиэ түбүгүн үлэлэрин кытта тэҥҥэ тутан, биһигини улаатыннарбыттара. Бырааппынаан ийэ-аҕа тапталыгар сууланан, дьиэ үлэтигэр эриллэн улааппыппыт. Сатаан бириэмэни аттарарга, ханнык да үлэттэн толлубат буолууга үөрэппиттэрэ.

-Киһи ханнык хаачыстыбатын сөбүлүүгүн?

- Төһө да кыыс буолларбын, оҕо эрдэхпиттэн сүөһү көрсөн, мас хайытан, муус ылсан улааппытым. Ол иһин, бастатан туран, киһи үлэһит буоларын, кыайыгас, куттаммат, инники туруоруммут сыалын ситиһэр, эппит тылыгар турар буоларын ылынабын.

снежана иней

- Снежана, эйигин ситиһиилээх аныгы кэм дьахтара диэн көрөбүн. Эн дьиэ кэргэн истиҥ ийэтэ, тапталлаах кэргэн, урбаанньыт, салайааччы, спортсменка буолаҕын. Биир киһи холугар элбэх эйгэлээх, өрүтттээх киһигин. Ону хайдах ситиспиккин ааҕааччыларга сырдат эрэ.

- Киһиэхэ анал диэн баар. Дьылҕа Хаан миигин “элбэҕи ситистин” диэн ыйаахтаабыт. Бу араас эйгэҕэ ситиһиилэрим - мин табыллыым. Олоххо барыта чэпчэки буолбат, ылыммыт санааҕын олоххо киллэрээри, элбэх үлэни, түбүгү көрсөҕүн.

снежана муус олоппос

-Урбааҥҥа хаһааҥҥыттан үлэлиигин? Туох санааттан урбаанньыт буолбуккунуй?

- Тэрилтэҕэ биир күдьүс үлэ киһини салҕыннарар. Тугу эрэ атыны оҥорбут-туппут киһи диэн санаа киирбитэ. Ол иһин 2012 сыллаахха бэйэбин холоно, урбаанньыт буолбутум. Уон сыл урбаан эйгэтигэр үлэлээтим. Бастаан фотосалон тэриммитим, онтукабын 9 сыл устата үлэлэттим. Хаартыскаҕа түһэрии судургу курдук эрээри, элбэх ньымалаах, туспа ирдэбиллээх, ис-иһигэр киирдэххэ, олус тартарыылаах идэ буолар. Пандемия кэмигэр ситим нөҥүө үлэлээбитим. Онтон кэргэмминээн 2020 сыллаахха баанньык тутан үлэҕэ киллэрбиппит. Быйыл аны улуус урбаанньыттарын “Мой бизнес” кииннэрин салайааччытынан ананан, аны бэйэм үлэлиир эйгэм дьонун-сэргэтин, быһаччы эттэххэ, биир түбүккэ сылдьар дьоммун салайар буоллум.

   - Урбаан эйгэтэ туох ыарахаттардааҕый?  

Олоххо атын көрүүлээх, бэйэ кыаҕар эрэнэр, баҕа санааларын олоххо киллэрэр дьон урбаан эйгэтигэр кэлэр. Бу эйгэ күүстээх үлэни ирдиир. Биири оҥорон баран уоскуйан хаалбакка, иннин диэки бара турдахха, үлэ-хамнас ситиһиллэр. Урбаанньыттар бары үптээх-харчылаах буолбаттар. Ааҕар-суоттуур, дьон наадыйарын таба тайанан үлэлээтэххэ, итиэннэ бэйэ ситиһиититтэн атыыҥ-тутууҥ, барыыҥ-кэлииҥ тутулуктаах. Бу ааспыт икки сыл элбэх киһини муннукка ыкта. Атыыһыттар ону оннук диэбэккэ, санаа, баҕа күүһүнэн бэйэ дьыалата сайдарыгар туруулаһаллар.    снежана мой бизнес

          -Дьахтар киһиэхэ барыларыгар бэриллибэтэх, ыйаахтамматах булт дьарыктааххын. Хаһааҥҥыттан бултуугунуй, ким эйигин булка уһуйбутай?

          - Инники эппитим курдук, оҕо эрдэхпиттэн уол үлэтин толорон, оҥорон кэлбитим. Булка аҕам Дмитрий Николаевич уһуйбута. Оҕо эрдэхпиттэн куска, балыкка тэҥҥэ илдьэ сылдьара.

снежана рыбаАҕам бастаан сыал ытарга үөрэппитэ. Онтон саалыын доҕордоспутум диэххэ сөп. айылҕалыын алтыһыы киһини умсугутар. Бэйэбинэн ылан көрөр буоллахха, дьахтар эмиэ булчут буолар кыахтаах. Хоту дойду дьахталлара булчуттарынан аатыраллар дии. Оттон биһиги эҥээр сэдэх көстүү, булчут дьахталлары син ааҕа билэбин. Булт абылаҥар ыллаттардаххына, бултууруҥ эмиэ таһымнаах, идэтийэн иһэҕин.

снеж

Ол курдук, кустуубун, туртастыыбын, убайдарбын кытта тайахха хаамабыт. Айылҕаҕа киһи сынньанар, эттиин-сиинниин, санаалыын чэпчиир. Бэлэмнэнии түбүгүттэн саҕалаан, киһи турукка киирэр. Тыаҕа-ойуурга кэпсэтииҥ да, аһыырыҥ да ураты буолар. Байанай мүчүк гынан бэристэҕинэ,  үөрүү, астыныы туругар киирэҕин.

снежана отонньутСыл аайы эрдэттэн лицензия ылаары, тиксээри манаһыы, кэтэһии бөҕө буолабыт. Лицензияҕа тигистэхпитинэ, туһунан үөрүү. Бултуурга хайаан да сиэри-туому тутуһабыт, бөхпүтүн хомуйан аҕалабыт. Бэйэм куска, тайахха анал  саалардаахпын.

       снежана булчут   -Элбэхтэн биир өйдөөн хаалбыт сырыыҥ ханныгый?

 - Бастакы улахан булдун киһи умнубат. Убайдарбын кытта тайахха түбэһэн ылбыппытын умнубаппын. Бастакы улахан булт соһуччу уонна үөрүүлээх буолар. Ону таһынан айаҥҥа тоҥмуккун-хаппыккын умнубат буолар эбиккин. Ыраах бараргар тиэхиньикэҥ эрэллээх буолуохтаах. Тиэхиньикэ 50-60 кыраадыс тымныыга алдьанар түгэннэрэ тахсааччылар. Ол эрээри улахан харгыстары көрсүбэккэ кэллибит, Айыыларбыт араҥаччылыы сылдьаллар диэн саха киһитин сиэринэн имнэнэбин.

снежана палатка та-Фотограф быһыытынан айылҕаны түһэрэҕин дуо? Бултаах хаартыскаларын бассаабынан ыытар дьону туох дии саныыгын?

 -Олохпор фотоаппарааппын туппутунан сылдьабын. Дьиэ кэргэммин, айылҕаны түһэрэрбин сөбүлүүбүн. Дьоллоох түгэни түһэрэн үйэтитии үчүгэй ньэгири хаалларар. Айылҕа кэрэтэ куруук харахпар көстөр. Булт кэмигэр кустары эрэ түһэрэбин, улахан булт сэрэҕи сөбүлүүр. Ситим нөҥүө сүүһүнэн, тыһыынчанан куһу, улахан булту ыыталларын сөбүлээбэппин, төттөрүтүн сүөргүлүүбүн.

снежана тымныы - Дьахтар төһө байанайдаах дии саныыгын? Куска дурдаҕа сытаҕын дуу, кэрийэҕин дуу?

- Ардыгар сарсыарда тыаҕа барыахпын баҕаран турааччыбын. Киһини тардар туох эрэ дьикти күүс баар буолар, ол күн бултуйабын аҕай. Турдаҕа биирдэ эмэ сытабын, анаан кэрийэн кустуубун. Кыһынын түүннэри балыктыыбыт. Сылаалаах, ол эрээри умсугутуулаах.

снежана палатки

-Спорт ханнык көрүҥүнэн дьарыктанаҕыный?

-Мин 2012 сылтан ытыынан дьарыктанабын. Олимпийскай ВП-4 көрүҥҥэ, туран ытыыга, 40 ытыыны биир чаас устата ытан, 1 разряды толорбутум.

снежана фитнес Ону таһынан 10 килэмиэтиргэ сүүрэбин. Бу орто дистанция аатырар. Өрөспүүбүлүкэҕэ 10-13 иһигэр киирэбин. Бу дьарыгым “любительскай”. Бэйэбин холонон көрүүм, кыахпын тургутуу.

снежана спорт

-Эргиччи дьарыктаах киһигин. Олортон быыс буллаххына, тугунан дьарыктанаҕыный?

-Кинигэ ааҕарбын, сибэккилэрбэр кашпо, магнитнай мозаика оҥорорбун сөбүлүүбүн.

снежана спорт 2-Аны кэргэн, ийэ быһыытынан бэйэҕин билиһиннэр эрэ.

-- Варламовтар дьиэ кэргэн түөрт оҕолоохпут. Икки кыыс, икки уол. Улахан кыыспыт VIII кылааһы, улахан уол V кылааһы, кыра кыыс I кылааһы бүтэрдилэр. Мурун бүөтэ кыра уолбут - дьыссаат киһитэ.  

снежана тренер-Аҕабыт Альберт Николаевич чэпчэки атлетикаҕа тренер. Альберт -- марафонец, 42  килэмиэтиргэ сүүрэр. Билигин Уус Алдаҥҥа ыытыллар спартакиадаҕа сүүмэрдэнэ сылдьар. Сборга икки улахаттарын илдьэ барда. Оҕолорун  сынньата, быыһыгар дьарыктыы илтэ. Төрөппүттэрим аттынааҕы уһаайбаҕа олороллор. Көрө-истэ, көмөлөһө олоробут.

снежана муж и дети-Ийэ сүрүн оруола туохханый?

-Аан дойду үрдүгэр саамай күндү киһи - Ийэ. Ийэм тапталынан угуттанан улааппыт дьоллоохпун. Ийэм олоххо бэлэмнээбит үөрүйэхтэрин оҕолорбор иҥэрэбин. Тапталы билбит оҕо олоххо туруктаах буолар. Үлэҕэ сыһыаран иитии олус туһалаах. Оҕолорбут олохторун суолларын сөпкө сирдээтэрбит, дьол-соргу түстэнэригэр эрэллээхпит.

снежана открытие- Кэрэхсэбиллээх кэпсээниҥ иһин махтанабын. Санаабыт санааҕын олоххо киллэрэ, айгыр силик айылҕа кэрэтин кэрэхсии сырыт диэн баҕа санаам бастыҥын аныыбын.

Вера Канаева, Таатта

  • 2
  • 3
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением