.jpg)
Бүтүн Арассыыйатааҕы профессиональнай бырааһынньыккытынан - Тыа хаһаайыстыбатын үлэһиттэрин күнүнэн итиитик - истиҥник эҕэрдэлиибин!
Күннэри, өрөбүллэри аахсыбакка, төгүрүк сыл устата ыарахан уонна эппиэттээх үлэҕит түмүгэ - хас биирдии Саха Сирин ыалын остуолугар дэлэччи тардыллар үрдүк хаачыстыбалаах олохтоох бэйэбит аспыт-үөлбүт буолар.
Өбүгэ саҕаттан олохтоммут төрүт дьарыкпыт: ынах сүөһү, сылгы, таба иитиитэ эмиэ эһиги кыһамньылаах илиигитинэн көрүллэрин - истиллэрин, ахсаана энчирээбэтин иһин махталлаахпыт.
Ураты тыйыс усулуобуйаҕа сири таҥастаан бурдук, хортуоппуй, оҕуруот аһын үүннэрэргит, харайаргыт эмиэ эһиги ахсаабат үлэҕититтэн тутулуктааҕа саарбаҕа суох.
Сылын аайы ыытыллар «Көмүс күһүн» бүтүн Арассыыйатааҕы быыстапка - дьаарбаҥкаҕа Саха Сиригэр оҥоһуллар экологическай ыраас, олохтоох бородууксуйа көрүҥэ элбээн иһэрэ, муҥутуур үрдүк наҕараадалары, биһирэбили ылара ону туоһулуур.
Аан дойду үрдүнэн буола турар уустук быһыыга - майгыга аһынан-үөлүнэн хааччыллыы стратегическай суолтата өссө улаатта, судаарыстыбаттан элбэх өрүттээх өйөбүл биһиги хаһаайыстыбаларбытыгар, фермердэрбитигэр оҥоһуллар. Бастыҥ кирбиилэри аһарбыт, үрдүк көрдөрүүлэри ситиспит хаһаайыстыбаларбыт, биирдиилээн үлэһиттэрбит биһиги маяктарбыт буолаллар. Быйылгы сылга Арассыыйаҕа Үлэ Дьоруойа ааты РФ Бэрэсидьиэнин илиититтэн туппут ыанньыксыт Владимир Африканович Михайлов аатын киэн тутта ааттыыбыт.
Инникитин да үлэҕит - хамнаскыт таһаарыылаах, тус олоххут этэҥҥэ буоллун, айылҕабыт үтүө хараҕынан көрдүн, өйөбүл-үбүлээһин эбиллэ турдун!
Истиҥ эҕэрдэни кытта, СӨ Ил Түмэн тыа сиригэр уонна аграрнай бэлиитикэҕэ сис кэмитиэт бэрэссэдээтэлэ, норуот дьокутаата
Андрей НАХОДКИН
-
0
-
0
-
0
-
0
-
0
-
0
