Аҕыйах хонуктааҕыта Петр Баттахов Геленджик куоракка ыытыллыбыт пауэрлифтиҥҥэ, пауэрспорка уонна армлифтиҥҥэ аан дойдутааҕы Гран при чемпионакка 70-74 саастаахтарга 100 киилэҕэ кыттан, өссө үрдүк көрдөрүүнү ситистэ диэн “Ньурба уоттара” хаһыат иһитиннэрэр.
– Пауэрлифтиҥҥэ троеборьеҕа, двоеборьеҕа уонна становай тягаҕа кыттан, үһүөннэригэр бастаатым, – диэн кэпсээтэ Петр Петрович. – Троеборье түмүгүнэн пауэрлифтиҥҥэ бэтэрээннэргэ абсолютнай чемпион буоллум. Саамай үрдүк ситиһиибинэн двоеборьеҕа, манна жим уонна становай тяга киирэр, 295 киилэни ылан, аан дойду рекордун олохтообуппун ааҕабын. Бу көрүҥҥэ рекорд 270 кг эбит, американец олохтообут. Становай тягаҕа тобукка диэри сыыйа тардыыга 205 кг көтөҕөн, эмиэ аан дойдуга бастыҥ көрдөрүүлэнним. Онтон пауэрспорт көрүҥҥэ, «строгий подъем на бицепс» диэҥҥэ бэйэм саастыылаахтарбар эмиэ аан дойду рекордун олохтоотум. «Аполлон аксель» диэн, модьу тутаахтаах штангаҕа 130 киилэни көтөҕөн эмиэ кыайдым.
Бу ситиһиилэрбэр төһүү күүс буолла тус тренерим, Россия уонна Саха сирин үтүөлээх тренера, Ньурба Чуукаарыттан төрүттээх Петр Николаевич Давыдов. Киниэхэ махталым муҥура суох.
Ити курдук, Петр Баттахов бу күрэхтэһииттэн барыта 6 кыһыл көмүс мэтээлинэн уонна абсолютнай чемпион кубогынан наҕараадаланан ситиһии көтөллөнөн кэллэ. Кэрэхсэбиллээҕэ, сиэнэ Артём 10 саастаахтарга становай тягаҕа 75 киилэҕэ кыттан эмиэ бастаата.
Саха киһитин айылҕаттан бэриллибит күүһүн-кыаҕын, дьулуурун бэйэтинэн тиийэн улахан таһымнаах түһүлгэҕэ өссө төгүл ситиһиилээхтик көрдөрбүт уонна итэҕэппит биир дойдулаахпыт Петр Баттаховы эҕэрдэлиибит уонна киэн туттабыт!
Хаартыска: Ньурба улууһун "Ньурба уоттара" хаһыат саайтыттан
-
0
-
2
-
0
-
0
-
0
-
0
