Тэрээһиҥҥэ СӨ култуураҕа уонна духуобунай сайдыыга миниистири солбуйааччы Марина Силина, олоҥхо тыйаатырын салайааччыта Мария Турантаева, М.К.Аммосов аатынан ХИФУ тылы үөрэтэр үнүстүтүүтүн саха литературатын кафедратын сэбиэдиссэйэ Валентина Семенова, суруйааччы поэт, суруналыыс, психолог Яна Байгожаева кытыннылар.
Бириэмийэни туттарыы сэтинньи 14 күнүгэр Былатыан Ойуунускай аатынан Саха академическэй тыйаатырыгар ыытыллыа. Уопсайа 10 номинация туттарыллыа. Сыллата кыттыан баҕалаахтар ахсааннара үксүүрэ этилиннэ. Кыайыылаахтар ааттарын дьоро күн тыйаатырга этиэхтэрэ. Бириэмийэни туттарыы ааспыт сыллардааҕар уратылаах буолуо. Көрөөччүлэргэ анаан икки миэтэрэ үрдүктээх анал фотозона тэриллиэ.
АЛАМПА ААТ (айар аймах түмсүүтэ) 2018 сыллаахха ахсынньы ыйга тэриллибитэ. Бастакы тэрээһин Ойуунускай аатынан литература түмэлигэр олунньу ыйын 1 күнүгэр буолбута. Бу күн Алампа аатын үйэтитэр уонна ускуустуба араас эйгэтин талааннаах дьонун бэлиэтиир соруктаах, Алампа аатынан норуот Премията төрүттэммитэ.
Сыл ахсын сэтинньи 14 күнүгэр, Алампа төрөөбүт күнүгэр, саха уус-уран литературатын, бэчээтин төрүттэһээччи, прозаик, драматург, поэт, тылбаасчыт, саха тыйаатырын бастакы дириэктэрэ, саха омук духуобунай лиидэрэ Анемподист Иванович Софронов-Алампа аатынан бириэмийэни туттарыы тэриллэр буолбута.
Бу эмиэ туспа историялаах. 1935 сыл алтынньы 22 күнүгэр А. И. Софронов Саха Сиринээҕи сэбиэскэй суруйааччылар сойуустарыгар туһаайбыт кэриэс суругар литературнай нэһилиэстибэтиттэн киирбит үптэн сахалыы суруллубут бастыҥ драматическай айымньыга кини аатынан бириэмийэ олохтонуохтааҕа ыйыллар. Бу кэриэс суругу XXI-c үйэ эдэр интеллигенцията, чуолаан “Алампа” айар аймах түмсүүтэ олоххо киллэрэр, үйэлээх үгэскэ кубулуйда.
Бу бириэмийэ, Саха сирин бары айар сойуустарын, түмсүүлэрин — суруйааччылары, худуоһунньуктары, киинэ, тыйаатыр үлэһиттэрин, муусука айааччылары сомоҕолуур, холбуур бириэмийэ буолар.
Сэтинньи 14 күнүгэр Былатыан Ойуунускай аатынан Саха тыйаатырыгар “Алампа» аатынан норуот бириэмийэтин V төгүлүн туттарыы үөрүүлээх тэрээһинэ буолуоҕа.
Быйылгы тэрээһин номинациялара бу курдуктар:
“Дархан ойууһут” (“Художник”);
“ Уран тыл” («Литературное слово»);
“Алампаҕа сүдү бэриниилээх” (“За верность Алампа”);
“Кылаан дьүрүскэн айааччы” (“Композитор”);
“Дэгиттэр режиссер” (“Режиссер”);
“Чаҕылхай артыыс” (“Лучшая артист”);
“Чаҕылхай артыыска” (“Лучшая артистка”);
“Ырыа-айааччы” (“Автор песенник”)
“Киинэ эйгэтин чыпчаал үлэһитэ” (Кинематограф)
“Өрөгөйдөөх өйөөччү” (Меценат года)
Бириэмийэ сүрүн сыалынан Россия уонна аан дойду, ону тэҥэ саха классическай литературатын уонна искусствотын үгэстэригэр сөп түбэһэр уонна байытар уус-уран айымньылары уонна үлэлэри айар талааннаах ааптардары булуу уонна биһирээһин буолар.
Ааты ыларга сорунааччылар үлэлэригэр сүрүн ирдэбилинэн, уус-уран уонна майгы-сигили өрүттэрин суолталара буолар.
-
0
-
0
-
0
-
0
-
0
-
0
