Уопсастыба

Сүбэ мунньах ССРС норуодунай артыыһа, режиссер В.В. Местников (1908-1958) аатыгар ананна. Мунньахха өрөспүүбүлүкэ Судаарыстыбаннай сүбэһитэ Андрей Борисов, култуура уонна духуобунас миниистирин солбуйааччы Марина Силина, үс судаарыстыбаннай тыйаатыр дириэктэрдэрэ Петр Макаров, Владислав Левочкин, Зинаида Борисова уонна Мэҥэ Хаҥалас улууһун баһылыга Дмитрий Тихонов, култуура, уопсастыбаннас бэрэстэбиитэллэрэ кытыннылар.

-- Василий Местников саха тыйаатыра, саха тыйаатырын ускуустубата сайдарыгар оҥорбут сүҥкэн өҥөтө умнуллуо суохтаах, – диэтэ мунньаҕы саҕалыырыгар Александр Жирков.

Василий Местников 1932 с. Москубаҕа, Тыйаатыр ускуустубатын үнүстүүтүгэр (билигин ГИТИС-кэ) үөрэнэ сылдьан, Саха Сириттэн сүүрбэттэн тахса ыччаты сүүмэрдээн илдьэн үөрэттэрбитэ. Ол эдэр дьон 1936 с. үнүстүүтү бүтэрэн кэлэн, Саха тыйаатырын устуоруйатыгар саҥа суолу тэлбиттэрэ. Кинилэр кэккэлэриттэн Саха Өрөспүүбүлүкэтин, Арассыыйа норуодунай, үтүөлээх артыыстара, ускуустуба биллиилээх үлэһиттэрэ Иоаким-Уустаах Избеков, Афанасий Петров, Матрена уонна Марк Слепцовтар, Николай Слепцов-Туобулаахап, Мария Белолюбская, Николай Харитонов, Георгий Алексеев о.д.а. үүнэн тахсыбыттара. Василий Васильевич Саха тыйаатырын сэбиэскэй кэмнээҕи устуоруйатыгар бастакынан олоҥхону сыанаҕа толорууну сөргүппүтэ. Ол курдук, 1937 с. Былатыан Ойуунускай «Туйаарыма Куо» олоҥхо-тойугун, 1940 с. Былатыан Ойуунускай «Ньургун Боотур» олоҥхотун туруортаабыта. 1943 с. бу испиэктээх Саха тыйаатырын сыанатыгар 100-с төгүлүн туруоруллубута. Киирбит үбүнэн «Ньургун Боотур» тааҥка оҥоһуллан, фроҥҥа бэриллибитэ.
Василий Местников «Ньургун Боотур» испиэктээҕи сөргүтэн, 1957 с. Москубаҕа ыытыллыбыт Саха Сирин күннэрин чыпчаал түгэнэ оҥорон, К.С. Станиславскай уонна В.И. Немирович-Данченко ааттарынан тыйаатырга ахсынньы 11-12 күннэригэр туруорбута. Онон, кини салалтатынан, саха олоҥхото дойду киин сыанатыттан бүтүн Сэбиэскэй Сойуус, Аан дойду таһымыгар тахсыбыта.
В.В. Местников баара эрэ 50 сааһыгар сылдьан, 1958 с. кыһыныгар сырдык тыына быстыбыта. Уһулуччулаах артыыс, режиссер, култуура салайааччытын аата умнуллубат, быйыл саас Аллараа Бэстээххэ аһыллыбыт култуура дыбарыаһыгар Василий Местников аата иҥэриллибитэ. Өрөспүүбүлүкэ үс судаарыстыбаннай тыйаатыра 2025-2026 сыллаах  саҥа сезоннарын кини аатыгар аныахтара.

-- Василий Васильевич курдук дьону үйэтитии саха култууратын, саха тыйаатырын ускуустубатын устуоруйатын үйэтитии, саҥаттан саҥа сүһүөх айар көлүөнэлэри ситимнээһин, кинилэр ситиһиилэригэр тирэҕирэн, инники диэки салгыы дьулуһуу мэктиэтэ буолар, – диэн Александр Жирков көрсүһүүнү түмүктээтэ.

Бу күннэргэ Новосибирскайга тахсыбыт В.В. Местников төрөөбүтэ 115 сылыгар анаммыт кинигэни оҥорбут дьоҥҥо махтанна, тыйаатырдар айар үлэлэригэр ситиһиилэри баҕарда. Бу туһунан барылааман пресс-сулууспата суруйар.
Хаартыска: Ил Түмэн пресс-сулууспата