“Уопсастыба олоҕун филососфиятыгар нуорманан улахан, элбэх оҕолоох дьиэ кэргэн буолуохтаах. Кэлэн иһэр алта сылга оҕо төрөөһүнүн халбадыйбаттык улаатарын ситиһиэхтээхпит. Маныаха биһиги оҕо иитиитигэр, үөрэтиитигэр, эрэгийиэн уонна экономика сайдыытыгар эбии быһаарыныылары ылыныахпыт. Хас биирдии туһаайан этиигэ дьиэ кэргэни өйөөһүн, кини олоҕун хаачыстыбатын тупсарыы этиллэр”, - диэн эттэ Владимир Путин.
Бэрэсидьиэн эбэн эппитинэн, 2030 сылга элбэх оҕолоох дьиэ кэргэннэр дьадаҥы буолууларын көрдөрүүтэ икки төгүл түһүөхтээх.
“Сорох миэрэлэр соторутааҕыта ылылыннылар. Тохсунньу 1 күнүттэн кыра дохуоттаах дьиэ кэргэннэргэ биир кэлим босуобуйа олохтонно. Ааспыт сыл бу босуобуйанан 11 мөлүйүөн тахса киһи туһанна. Социальнай хантараагы түһэрсии судургутуйда, бу миэрэ инникитин кэҥиэ. Маныаха эбии 100 миллиард солкуобай эбии үп ирдэнэр”, - диэтэ Бэрэсидьиэн.
2030 сылга диэри суоттанар саҥа национальнай бырайыак туһунан иһитиннэрдэ. Саҥа нацбырайыагынан ордук ыарахан демографическай балаһыанньалаах эрэгийиэннэргэ дьиэ кэргэннэри өйөөһүн бырагырааммаларыгар 73 млрд солк.тахса үп көрүллүө.
Чэпчэтиилээх ипотекаҕа ыстаапка 6 саастарыгар диэри оҕолоох дьиэ кэргэннэргэ оннунан хаалыа. Үһүс оҕо төрөөтөҕүнэ бэриллэр кирэдьиит сабыытыгар көрүллэр 450 тыһ. солк. үп бырагырааммата салҕаныа.
Элбэх оҕолоох дьиэ кэргэннэргэ нолуок вычета улаатыа. Ол курдук бастакы оҕоҕо – 1400 солк, 2800 – иккискэ, 6000 – үһүс уонна онтон кэлэр оҕолорго.
Ийэ хапытаалын суумата бастакы оҕоҕо 630 тыһ. солк. тэҥнэһиэ, оттон иккискэ – 202 тыһ. солк.
Санатан эттэххэ, быйыл дойду салайааччытын 19-с туһаайан этиитэ буола турар. Сылын ахсын ыытыллар тэрээһин аһаҕастык парламент икки балаататыгар туһаайыллар . Манна дойду билиҥҥи бэлиитикэтигэр сыһыан, тас уонна ис политикаҕа сүрүн хайысхалар ыйыллаллар. Стратегическай былааннааһыҥҥа бу биир сүрүн докумуон буолар.
-
0
-
0
-
0
-
0
-
0
-
0
