Егор Афанасьевич Исидор Барахов өрөспүүбүлүкэ экэниэмикэтэ, чуолаан бырамыысаланнас сайдыытыгар ураты кылааттааҕын санатта. Исидор Барахов баара суоҕа 20 эрэ сааһын ааһан баран, өрөспүүбүлүкэни төрүттэспитин эттэ. Аныгы ыччат олоххо ураты көрүүлээҕин, сайдыылааҕын, киэҥ билиилээҕин ыйан туран, дойдубут сайдыытыгар бэйэлэрин умнуллубат, чаҕылхай хардыыларын оҥоруохтара диэн эрэнэрин биллэрдэ.
Александр Григорьевич мустубуттары Сахабыт Сирин биир сүрүн судаарыстыбаннай бырааһынньыгынан эҕэрдэлээтэ. Автономия олохтонуоҕуттан кэм кэрдии ааһан, 1992 сыллаахха эмиэ бу кэмҥэ аныгы Конституция ылыллыбытын санатта, Саха Сирэ модун Арассыыйаҕа субьект быһыытынан киирбитин эттэ. Автономияны төрүттэспит улуу уолаттарбыт олохторо кылгас эрээри, метеор курдук чаҕылхай, умнуллубат суоллаах-иистээх, суолталаах этэ диэн аҕынна. Билигин Өрөспүүбүлүкэбит үтүө үгэстэрэ инновациялары кытары ыкса ситимнээҕин санатан туран, салгыы сайдарыгар, кэҥииригэр баҕа санаатын тириэртэ.
Тыл этээччилэр Исидор Никифорович олоҕун төрөөбүт өрөспүүбүлүкэтин, Саха Сирин дьонун интэриэстэрин көмүскээһиҥҥэ анаабыта. Өрөспүүбүлүкэни төрүттээччилэр эр санааларынан, дьулуурдарынан, норуоттарын туһугар үрдүк эппиэтинэстээхтэринэн биллэллэрэ. Уустук дьүүллэһиигэ, мөккүөргэ, бэл, кытаанах утарылаһыыга, харгыстаһыыга кинилэр туруулаһан, автономнай өрөспүүбүлүкэ статуһун ылары ситиспиттэрэ диэн бэлиэтээтилэр.
Санатан эттэххэ, Саха Өрөспүүбүлүкэтин судаарыстыбаннаһын төрүттэспит уһулуччулаах бэлитиичэскэй уонна судаарыстыбаннай диэйэтэл, Саха Сирэ социальнай-экэнэмиичэскэй сайдыытыгар кылаатын киллэрсибит Исидор Никифорович Барахов Максим Аммосовтыын, Платон Ойуунускайдыын, Степан Аржаковтыын, Степан Васильевтыын өрөспүүбүлүкэ төрүттэниитигэр сүҥкэн кылаатын киллэрсибитэ.
Кини үрдүкү салалтаҕа эппиэтинэстээх дуоһунастарга үлэлээбитэ: САССР Совнаркомун бэрэссэдээтэлэ (1922—1924), ВКП(б) Саха Сиринээҕи обкомун бастакы сэкирэтээрэ (1926—1928), КК ВКП(б) тыа хаһаайыстыбатыгар Илин Сибиир уонна Уһук Илин салаатын сэбиэдиссэйэ (1933—1938).
-
0
-
0
-
0
-
0
-
0
-
0
