Уопсастыба

​Бэлиэ күн өрөспүүбүлүкэ салалтата кыттыылаах Чөркөөх сэлиэнньэтин модульнай успуорт саалатын тутулла турарын, уонна Даайа Аммалыыр муостаны көрүүттэн саҕаланна. Салгыы Былатыан Ойуунускай киинэ түспүт Муҥха Дэлбэрийбит алааһыгар ыалдьыттар, улуус уопсастыбаннаһа, олохтоохтор кыттыылаах сүгүрүйүү миитинэ тэрилиннэ.

Миитиҥҥэ улуус баһылыга Айаал Бурцев, Саха Өрөспүүбүлүкэтин Бырабыытылыстыбатын Бэрэссэдээтэлин солбуйааччы Сергей Местников, Ил Түмэн дьокутаата Прокопий Рахлеев уо.д.а тыл эттилэр, эҕэрдэлээтилэр. Бырабыыталыстыба Бэрэссэдээтэлин солбуйааччы Сергей Местников олохтоох салайыныы сайдыытыгар кылаатын иһин «Саха Өрөспүүбүлүкэтин муниципальнай сулууспатын туйгуна» бэлиэни Баайаҕа нэһилиэгин баһылыгын солбуйааччы Анна Николаеваҕа туттарда.

Үтүө суобастаах үлэлэрин, олохтоох салайыныыга кылааттарын иһин Саха Өрөспүүбүлүкэтин Бырабыытылыстыбатын, Ил Дархан дьаһалтатын салайааччы Махтал суругунан Уолба нэһилиэгин баһылыгын солбуйааччы Иван Беляев, Орто Амма нэһилиэгин баһылыгын солбуйааччы Анна Васильева бэлиэтэннилэр. Марианна Степанова култуура уонна духуобунас сайдыытыгар өр сыллаах таһаарыылаах үлэтэ сыаналанан, «Саха Өрөспүүбүлүкэтин култууратын үтүөлээх үлэһитин» аатынан бэлиэтэннэ.

Идэлэригэр бэриниилээх, төрөөбүт дойдуларын сайдыытыгар туруулаһан үлэлиир Акулина Мочкина «Саха Өрөспүүбүлүкэтин үөрэҕин эйгэтин туйгуна», Роман Аргунов «Саха Өрөспүүбүлүкэтин үбүн министиэристибэтин үп үлэтин туйгуна» бэлиэлэринэн, Петр Захаров Ил Түмэн олохтоох салайыныыга сис кэмитиэтин Бочуотунай Грамотатынан, Иннокентий Дягилев Ил Түмэн наукаҕа уонна үөрэххэ сис кэмитиэтин Бочуотунай Грамотатынан наҕараадаланнылар. Саха Өрөспүүбүлүкэтин Бырабыытылыстыбатын Гражданскай турук аакталарын суруйар салаа Махтал суруга Октябрьскай нэһилиэгин баһылыга Андрей Семеновка туттарылынна.

Мустубут дьон улуу Былатыан төрөөбүт балаҕаныгар, үөрэммит оскуолатыгар экскурсиялаан, ураты турукка киирэн ыллылар. Салгыы Саппыйа алааска тэриллибит «Манна дьол, манна күн» диэн быыстапканы Ойуунускай аатынан Судаарыстыбаннай түмэл дириэктэрэ Михаил Аржаков сырдатта. Саха бастакы Төрүт сокуона хайдах оҥоһуллубутун, ылыллыбытын туһунан сиһилии сэһэргээтэ.

Өрөспүүбүлүкэ күнүгэр анаммыт үөрүүлээх тэрээһиннэр улуус киинигэр уонна Дьохсоҕон нэһилиэгэр тэҥҥэ ыытылыннылар. Ытык Күөлгэ Былатыан Ойуунускай аатынан искибиэргэ миитин буолла. Эҕэрдэ тылы улуус баһылыгын социальнай боппуруостарга солбуйааччы Святослав Сунхалыров, Таатта нэһилиэгин баһылыга Егор Павлов, үөрэх салаатын салайааччытын солбуйааччы Татьяна Тютрина эттилэр. Бу улахан суолталаах күҥҥэ үүнэр көлүөнэ ыччата пааспар тутар чиэскэ тиксэн, улуус салайааччытыттан пааспар тутан үөрдүлэр. Үөрүүлээх тэрээһин Сомоҕолоһуу оһуохайынан түмүктэннэ.

Дьохсоҕон нэһилиэгэр Таатта үрэҕи туоруур, нэһилиэги ситимниир муоста үөрүүлээх аһылыытыгар тырааныспар уонна суол хаһаайыстыбатын миниистирин солбуйааччы Анатолий Потапов кыттыыны ылла.

Эбиэт иннинэ улуус баһылыгын солбуйааччы Руслан Захаров өрөспүүбүлүкэ салайааччыларын кытары «Манчаары оонньууларын» чэрчитинэн тутулла турар ипподрому, МФОКЦ-у көрдүлэр, кыһалҕалаах боппуруостары дьүүллэстилэр.

Күн иккис аҥарыгар улуус дьаһалтатын аактабай саалатыгар «Манчаары оонньууларын» тэрээһинигэр анаммыт сүбэ мунньах тэрилиннэ. Мунньаҕы Бырабыыталыстыба Бэрэссэдээтэлин солбуйааччы Сергей Местников салайда. Мунньах үс блогунан барда. Блоктар эбийиэктэри тутуу, култуурунай тэрээһиннэри ыытыы, уунан хааччыллыы, волонтердар үлэлэрин, научнай ааҕыылар, аһатыы курдук, уо.д.а тутаах боппуруостары хаптылар.

Мунньахха успуорт уонна физическай култуура миниистирэ Леонид Спиридонов, Таатта улууһун баһылыгын солбуйааччы Руслан Захаров итиэннэ онлайн киэбинэн култуура, успуорт, тутуу, олох-дьаһах хаһаайыстыбатын, ыччат министиэристибэлэрин эпиэттээх үлэһиттэрэ кытыннылар.

Бу курдук, сыллата Саха Автономиятын төрүттэспит улуу убайбыт Былатыан Ойуунускай пааматынньыгар саҥа кэм олоҕун сырдата, үлэһит үтүө дьоммутун чиэстии, кини үрдүк аатын ааттаан туран, сибэкки дьөрбөтүн инникини түстүү уурабыт, сайдыы саҥа хайысхаларын тобулабыт.

Хаартыскаҕа ааптар түһэриитэ