Түгэнинэн туһанан, ааҕааччыларбытын «Ил Түмэн» хаһыат эрэдээксийэтин аатыттан эҕэрдэлиибит. Кырачааннарга эрэ анаан бу күн араас көрдөөх оонньуулар, кэнсиэртэр, куонкурустар ыытыллыахтара. Онно баҕалаахтар бары кыттар кыахтаахтар, оттон маастар-кылаастарга сатабылларын сайыннарыахтара.
Саха Сиригэр быйыл Оҕо саас сыла биллэриллибитинэн, быйылгы бырааһынньык ураты суолталаах. Бу күн оҕо, дьиэ кэргэн көмүскэлигэр анаан туох уларыйыылар киирбиттэрин ырытан көрдүбүт.
Дойдубут бэрэсидьиэнэ Владимир Путин Дьиэ кэргэн сылыгар тупсаҕай олохтоох ыал аатын-суолун үрдэтиигэ болҕомтобутун ууруохтаахпыт, көмөҕө наадыйар эдэр уонна элбэх оҕолоох ыалларга көмөлөһүөхтээхпит диэн этэн турар. Маныаха тустаах бэлиитикэ ыытыллан, ийэ буолууга уонна оҕо сааһы өйөөһүҥҥэ үбүлээһин кээмэйэ 2018 сылтан үрдээтэ. Ол курдук, 2018 сылга — 3,5 млрд солк. эбит буоллаҕына, бүгүн 29,5 млрд солкуобайга тэҥнэһэр. Араас бырагыраама тиһигин быспакка киирэр. Холобурдаатахха, Ийэ хапытаала, оҕо төрөөтөҕүнэ үбүнэн көмө, элбэх оҕолоохтор олорор усулуобуйаларын тупсарыы, сир учаастагын босхо биэрии.
Сахабыт Сиригэр өйөбүл миэрэлэрэ сыллата элбииллэр. Буолан ааспыт сэттис уочарата суох пленарнай мунньахха Ил Түмэн дьокутааттара элбэх оҕолоох ыал статуһа болдьоҕо суох буоларын туһунан сокуону бигэргэттилэр.
Быйыл муус устар бүтүүтэ Ил Дархан Айсен Николаев элбэх оҕолоох ыаллары социальнай өттүнэн өйүүр эбии миэрэлэр тустарынан ыйаахха илии баттаабыта. 2024 сыл балаҕан ыйын 1 күнүттэн олоххо киириэхтэрэ. Ол курдук, элбэх оҕолоох ыаллар дьиэ-уот уонна хомунаалынай өҥөлөргө олохтоммут төлөбүр кээмэйиттэн 30 бырыһыантан намыһаҕа суох кээмэйдээх чэпчэтиинэн туһаныахтара, оскуолаҕа оҕолор босхо аһыахтара, куорат уонна куорат таһынааҕы тырааныспарка дьиэ кэргэн дохуотуттан тутулуга суох босхо айанныахтара. Маны сэргэ, элбэх оҕолоох ыал оскуоланы бүтэрэр оҕото төлөбүрдээх орто анал үөрэххэ киирдэҕинэ, 50 тыһ. солк. кээмэйдээх биирдэ көрүллэр харчынан көмө оҥоһуллуо.
Кулун тутар 28 күнүгэр СӨ Бырабыыталыстыбатын мунньаҕар уонтан элбэх оҕолоох дьиэ кэргэттэр социальнай хантараак көмөтүнэн тырааныспары ылар кыахтаналларын туһунан уураах ылыллыбыта. Маныаха дьиэ кэргэн оҕолоро сокуоннай саастарын туола илик буолуохтаахтар, ону тэҥэ, күнүскү үөрэххэ үөрэнэр буоллахтарына, 23 саастарыгар диэри ыйыллан турар.
-
0
-
0
-
0
-
0
-
0
-
0
