Саха Сиригэр ойуур хаһаайыстыбатыгар идэлэригэр
бэриниилээх, үрдүк таһымнаах исписэлиистэр үлэлииллэр. Бүтэһик сылларга сайын ахсын Саха Сирин бүттүүнэ
ойуур баһаарын утары охсуһууга үлэлиир. Быйыл Хаҥалас, Алдан, Өлүөхүмэ, Абый оройуоннарыгар ойуур баһаардара турар 5 кылаастаах кутталлаах метеорологическай көстүү
бэлиэтэммитэ.
Абый улууһун Киэҥ Күөл сэлиэнньэтин таһынан ойуур баһаара туран, олохтоохтор эвакуацияланарга күһэллибиттэрэ. Маны тэҥэ Үөһээ Бүлүү, Бүлүү, Кэбээйи, Өлүөхүмэ, Усуйаана, Горнай, Сунтаар, Ленскэй, Томпо, Таатта, Мииринэй оройуоннарыгар күүстээх үлэ барбыта.
Уоту умуруорууга парашютистар, ойуур иниспиэктэрдэрэ уо.д.а. салаа үлэһиттэрэ бары күүстэрин ууран үлэлииллэр.
Биир оннук идэлэригэр ураты бэриниилээх, ыарахаттартан чаҕыйбат үлэһиттэрдээх тэрилтэнэн
“Якутлесресурс” буолар. Бүгүн бу бырааһынньык күнү көрсө, кинилэри кытары билиһиннэрэбит.
“Якутлесресурс” судаарыстыбаннай автономнай тэрилтэ Сахабыт Сиригэр
ойуур баһаардарын бохсор, уот турбатыгар үлэлиир.
Генеральнай дириэктэр Виктор Викторович Омуков салайыытынан 631 киһи үлэлиир,
олортон 564 ойуур баһаарынайдара.
Өрөспүүбүлүкэбит 21 улууһугар 22 филиаллаах, Дьокуускай куоракка 1 салаалаах. Ойуур баһаардарын утары охсуһарга киэҥ нэлэмэн өрөспүүбүлүкэбит араас муннугар 43 ыстаансыйа баар.
Кинилэр күннээҕи үлэлэрин сүрүн соруга – күөх суугун тайҕабыт уоттан куттала суох буолуулара, ойуур баһаардарын умуруоруу, ойуур хаһаайыстыбаларыгар араас үлэлэри ыытыы диэн тэрилтэ пресс-киинэ иһитиннэрэр.
Ойуур баһаардарын эрэ кытары охсуһуу буолбакка, бохсууга күүстээх үлэ барар. Ол иһигэр, тыаҕа туһаныллар суоллары, минерализованнай балаһалары, баһаар быһа барыытын утарсар солооһуннары оҥоруу уонна саҥардыы, баһаары сэрэтэргэ кураанах оту хонтуруоллаан өртөөһүн о.д.а.
Маны тэҥэ, ойуурга дьон сынньанар сирдэрин тупсараллар, баһаартан куттал суох буолуутугар иһитиннэриилээх истиэндэлэри оҥороллор, сиринэн кэтээн көрүүнү тэрийэллэр.
Ол курдук лесопатологическай чинчийиилэри ыыталлар, айылҕа бэйэтэ чөлүгэр түһэригэр көмөлөһөллөр, тыаны кэрдиини быһаараллар, туһаныллыбат маһы хомуйаллар, санитарнай соруктаах кэрдиини оҥороллор, аудио-видео роликтары устан дьоҥҥо иһитиннэрэллэр.
Манна даҕатан эттэххэ, “Якутлесресурс” оптонуомунай тэрилтэ СӨ Бырабыыталыстыбатын
уурааҕынан 2007 сыл ахсынньы 25 күнүгэр тэриллибит. Ол кэмҥэ “Саха Өрөспүүбүлүкэтин ойуурдарын инвентаризациялааһын, чөлүгэр түһэрии, харыстааһын уонна көмүскээһин киинэ”
диэн ааттааҕа. Кэлин, 2013 сыл олунньу 19 күнүнээҕи 122-р диэн нүөмэрдээх Бырабыыталыстыба уурааҕынан “Якутлесресурс” диэн ааттаммыт.
Галина МАТВЕЕВА
-
0
-
0
-
0
-
0
-
0
-
0
