2025 сыл Арассыыйаҕа аҕа дойдуну көмүскээччи сылынан, оттон Саха Өрөспүүбүлүкэтигэр – ийэ дойдуну көмүскээччи сылынан биллэрилиннэ. Кэлэр сылга дойдубутугар сүҥкэннээхэй бэлиэ даатаны – Аҕа дойду Улуу сэриитигэр Кыайыы 80 сылын бэлиэтиибит.
Хаһыат Саҥа 2025 сылы көрсө бырааһынньыктааҕы нүөмэригэр норуот дьокутааттара бу ааһан эрэр сылга туох-ханнык ситиһиилэрин билиһиннэрэллэр уонна Саҥа Дьылынан эҕэрдэлэрин тириэрдэллэр.
Ил Түмэн төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева:
– Саҥа 2025 сылга түөрт бэтэринээринэй сулууспа юридическай сирэй быһыытынан төннүөхтэрэ. Бу түөрт сыллааҕы дакаастаһыы, туруорсуу, сыралаах үлэ түмүгэ. Бары билэргит курдук, бэтэринээринэй сулууспа хас биирдии улууска ас-үөл, көтөр-сүүрэр, кыыл, харамай, үөн-көйүүр, тыынар салгыммыт өттүнэн куттал суох буолуутун ирдиир саамай сүрүн хайысхабыт.
Маны тэҥэ, табаһыттарга төлөнөр субсидия индексацията икки сыллааҕы ороскуота толуйулларыгар быһаарыы ылылынна.
Кэбээйи улууһун Сангар бөһүөлэгэр өр сылларга эндогеннай баһаары кытары охсуһуу барар. Боппуруоһу быһаарарга быйыл 31 мөл.солк. көрүлүннэ, үлэлэр саҕаланыахтара.
Түгэнинэн туһанан, Сахабыт Сирин Бырабыыталыстыбатыгар боппуруостар быһаарыллыбыттарыгар махталбын тиэрдэбин.
– Аҕыйах ахсааннаах норуоттарга аналлаах сокуоннар федеральнай таһымҥа ылылыннылар. Маныаха туһуламмыт эрэгийиэн сокуоннара бастыҥнар истэригэр киирэр. Ол туһунан араас пуорумнарга, сийиэстэргэ даҕаны этэллэр. Туох барыта силистээх-мутуктаах. Үлэ тиһигэ быстыбакка 90-с сыллартан ыытыллар. Маныаха норуот дьокутааттара дьон этиилэрин, боппуруостарын ырытан баран, сокуон барылларын бэлэмнээн олоххо киллэрбиттэрэ. Олор истэригэр З.А. Корнилова, А.В. Кривошапкин, А.Н. Жирков. Кинилэргэ дьон-сэргэ, биһиги дьокутааттар махталбыт улахан.
Ханнык баҕарар боппуруос быһаарыллар кыахтаах. Маныаха тулуур, дьулуур, кытаанах санаа ирдэнэр. Онон хас биирдии киһи ылсыбыт боппуруоһун тиһэҕэр тиэрдэргэ кыһалыннын.
-
0
-
0
-
0
-
0
-
0
-
0
