2025 сыл Арассыыйаҕа аҕа дойдуну көмүскээччи сылынан, оттон Саха Өрөспүүбүлүкэтигэр – ийэ дойдуну көмүскээччи сылынан биллэрилиннэ. Кэлэр сылга дойдубутугар сүҥкэннээхэй бэлиэ даатаны – Аҕа дойду Улуу сэриитигэр Кыайыы 80 сылын бэлиэтиибит.
Хаһыат Саҥа 2025 сылы көрсө бырааһынньыктааҕы нүөмэригэр норуот дьокутааттара бу ааһан эрэр сылга туох-ханнык ситиһиилэрин билиһиннэрэллэр уонна Саҥа Дьылынан эҕэрдэлэрин тириэрдэллэр.
Ил Түмэн доруобуйа харыстабылыгар сис кэмитиэтин бэрэссэдэтэлэ Светлана Давыдова:
– Ааһан эрэр 2024 сылга кэмитиэт 20-тэн тахса боппуруоһу көрдө. Ол түмүгэр түөрт сокуон барыла ылылынна, биир сокуон барыла маҥнайгы ааҕыыны ааста. Сорох ырытыллыбыт сытыы боппуруостарга тохтуом.
“Ирдэнэр мэдиссиинэ страховкалааһынын территориальнай пуондатын судаарыстыбаннай уорганнарыгар үлэлиир исписэлиистэр мэктиэлэрин уонна кэмпэнсээссийэлэрин туһунан” сокуоҥҥа эбиилэри киллэриигэ тохтуом. Элбэх сыллар усталарыгар бу эйгэҕэ үлэлиир мэдиссиинэ үлэһиттэригэр уонна кинилэр дьиэ кэргэттэрин чилиэннэригэр уоппускаҕа бырайыастара хантан үбүлэнэрэ ситэ быһаарылла илик этэ. Онон биһиги кэмитиэппит ОМС систиэмэтинэн үлэлиир тэрилтэлэр балаһыанньаларыгар эбиилэри киллэрэн, бырайыас страховкалааһын үбүттэн төлөнүөн сөбүн туһунан этии киллэрдибит, ол өйөннө.
Арассыыйа Федерациятын 750 №-дээх уурааҕыгар уларыйыылары киллэриигэ үлэлэһэ сылдьабыт. Бу кимэ биллибэт өлүгү үөрэх уонна билим эйгэтигэр туһаныы туһунан. Маныаха РФ доруобуйа харыстабылын миниистирин солбуйааччытыттан эппиэт туттубут. Боппуруоһу ис дьыала уорганнарын, юстиция министиэристибэтин, Судаарыстыбаннай Дуума кэмитиэттэрин кытары үөрэтэллэр. Бу туһунан сорудаҕы бырабыыталыстыба бэрэссэдээтэлин солбуйааччы Татьяна Голикова биэрдэ.
Элбэх ыйытык босхо эминэн хааччыйыы боппуруоһугар турар. Маныаха “Круг добра” пуонда нөҥүө мэдиссиинэ көмөтүнэн туһанааччылар саастарын 18-тан 23-гэр диэри үрдэтэри ырыттыбыт, Ярославль куорат дууматын этиитин өйөөтүбүт. Бу салааҕа нэһилиэнньэттэн киирэр боппуруостары уонна этиилэри дьокутааттар хаһан баҕарар учуоттуубут, ылынабыт.
Күһүҥҥү уонна сааскы сиэссийэлэргэ мэдиссиинэ каадырдарынан хааччыйыыны көрдүбүт. Бу хайысхаҕа үлэ хайдах барыахтааҕа торумнанан турар. Мэдиссиинэ исписэлиистэрин бэлэмниир үөрэх тэрилтэлэригэр сыаллах үөрэтиигэ кубуоталары элбэтии боппуруоһа турар. Орто уонна үрдүк үөрэх кыһаларыгар үлэ тэҥник барар.
Бэс ыйыгар каадырдары миэстэтигэр олохсутууга парламент истиилэрэ ыытыллыбыта. Маныаха биһиги кэмитиэппит этиилэри киллэрбитэ. “Земскэй дуоктар”, “Земскэй биэлсэр” бырагыраамаларынан ыраах, уустук суоллаах-иистээх нэһилиэктэргэ үлэлии барбыт исписэлиистэргэ эбии өйөбүл миэрэлэригэр этии киллэрбиппит, ону Арасыыйа бырабыыталыстыбатыгар көрүүгэ, үөрэтиигэ ыыппыппыт, эппиэтэ кэлэ илик. Салгыы бу хайысхаҕа үлэ барыа.
Хас биирдии киһиэхэ Саҥа Дьыл туох эрэ кэрэни, дьиктини саҕар. Мин Сахабыт Сирин хас биирдии олохтооҕор бу бырааһынньыгы чугас дьоннорунуун, аймахтарыныын бииргэ ылалларыгар баҕарабын. Дьиэ кэргэн үтүө үгэстэрэ элбээтин, сайыннын.
-
0
-
0
-
0
-
0
-
0
-
1
