Кыттааччылар Сахабыт Сирин араас муннуктарыттан: Уус Алдан, Мэҥэ Хаҥалас, Чурапчы, Амма, Томпо, Ньурба, Бүлүү,Ленскэй, Эбээн Бытантай, Верхоянскай , Алдан, Уус Майа улуустарыттан, ону таһынан уруулуу Кыргызстан, Бурятия өрөспүүбүлүкэлэриттэн, Соҕуруу Африка Намибия, Ботсвана дойдуларын бирэстэбиитэллэрэ кытта бааллар. Күрэх түмүгүнэн саастарынан арахсан «ААР КУО» (17-30 саастарыгар диэри), «ААР ХОТУН» (31-41 сс), уонна «ААР ДАЛБАР» (42 саастан үөһээ) диэн анал ааттары ылыахтара. Муҥутуур кыайыылаах «ААР КУДАЙ» үрдүк аатын сүгүөҕэ.
Кыргыттар сахалыы үрүҥ халадаайдаах кыталыктыы кынталдьыһан киирэн саха сиэринэн алгыстаннылар. Алгыһы Саха Сирин үтүөлээх артыыһа, Арассыыйа култууратын үтүөлээх үлэһитэ Афанасий Фёдоров иилээн-саҕалаан ыытта. Биллэр-көстөр спортка ситиһиилээх эр бэртэрэ, кинилэр ортолоругар мас тардыһыыга Аан Дойду уонна Европа чемпиона, Арассыыйа спордун маастара Василий Захаров, чэпчэки атлетикаҕа Арассыыйа 3 төгүллээх чемпиона Саргылаан Семёнов о. д.а сибэкки дьөрбөтүн бэлэхтээтилэр.
Салгыы кыргыттар хаһыс нүөмэринэн кытталларын долгуйа таллылар. Бу нүөмэринэн кулун тутар 16 күнүгэр Суорун Омоллоон аатынан Опера уонна Балет судаарыстыбаннай тыйаатырыгар Гранд- Финалга кыттыахтара. Муҥутуур кыайыылаах Индияҕа ыытыллар Норуоттар икки ардыларынааҕы «MRS.UNITY 2025» кэрэ куолар күрэхтэригэр путёвканы уонна харчынан 1 мөллүйүөн солкуобайдаах бириис тутуоҕа! «Аар Кудай» кэрэ куоларын 8 күн устата реалити шоу ньыматынан араас көрсүһүүлэр, маастар кылаастар, духуобунас практикалара,cайдыы, бэйэ-бэйэни кытта билсии, кэрэ эйгэлиин алтыһыы, кэтэһэр.
Зарьяна Юмшанова, «Аар Кудай» бырайыак ааптара, иэйиитэ, салайааччыта, инвестора, «ААР КУДАЙ» духуобунай пуонда төрүттээччитэ, Индияҕа ыытыллыбыт «MRS.UNITY WORLD», Россияҕа «MRS RUSSIAN WORLD» Кэрэ куолар күрэхтэрин муҥутуур кыайыылааҕа, духовнай сирдээччи (проводник) санаатын маннык үллэстэр:
-- «ААР КУДАЙ» кэрэ көстүү уонна сиэрдээх майгы күрэҕигэр кыттааччы ис туруга бигэ туруктанарыгар, бэйэҕэ эрэллээх буоларыгар, дууһатын сайыннарарыгар, алмаас таастыы чочулларыгар , Аан дойду аана хас биирдии киһиэхэ аһаҕас диэн санаанан салайтаралларыгар сүрүн болҕомтобутун уурабыт. Мантан сиэттэрэн Төрүт Сахабыт култууратын, итэҕэлин, сиэрин-туомун аан дойду таһымыгар таһаарар, дьоҥҥо-сэргэҕэ биллэрэр сыаллаахпыт. Аар Кудай диэн тыл үөһэттэн ананан дьиктитик кэлбитэ. Аар кудай - улахан киэҥ куйаар таптала буолар. Аар - киэҥ куйаар, Кудай - диэн уус. Ол иһин хас биирдии дьахтар бэйэтэ туспа уратылаах, киэҥ куйаардаах, ситимнээх, аан дойду дьахталларыгар аан аһаҕас!
Уйгулаана Портнягина
Хаартыска: Дмитрий Ляшеев
-
1
-
3
-
0
-
0
-
0
-
0
