Ас астааһынын кытары дьүөрэлэспит быыстапка сэһэргэһии бэрээдэгинэн барда. Онно Любовь Петровна оҕо, ыччат сааһыттан ийэтин батан иистэммититтэн саҕалаан, оҕолоругар, сиэннэригэр, аймахтарыгар, нэһилиэк олохтоохторугар иистэммитэ кэпсэннэ. Любовь Петровна боростуой ииһинэн муҥурдаммакка, кыбытыылаах ииһи таһынан, ютубка омук дойдулар таҥас кырыдаһыныттан тигэр ньымаларын: пиццаны, японскай крейзи-квилт, турецкай синель курдук иис ньыматыгар үөрэнэн, хартыыналары, суумкалары тигэр. Нэһилиэктээҕи «Айылҕаана» диэн ийэлэр, эбэлэр түмсүүлэригэр дьарыктанар.
Онтон уруһуйдьут быһыытынан биир да маастар-кылааһы көтүппэккэ, уруһуй курдук ускуустуба кэрэ эйгэтин аанын аһан, гуаһынан, акрилынан, маслонан, китайскай папируска кытта уруһуйдуурун, граттаһы кытта баһылаабыт. Ону бэйэтэ: «Тулалыыр кэрэ уларыйыытын, өҥө уларыйыытын күннэтэ бэлиэтии көрөр, сэргиир буоллум», – диэн кэпсиир.
Гастробыыстапкаҕа кэпсэтэ-кэпсэтэ, тууһаммыт уомултан «Индигиирка» салаат, Любовь Петровна отонноох мастарыттан хомуйбут саад моонньоҕонун, облепиха, жимолость, малина, уохта холбоһуктаах утаҕы, яблокалаах, отоннордоох, йогуртаах минньигэс десерты уонна смузины тэрээһиҥҥэ кэлбит мааны ыалдьыттар амсайдылар.
Биир сырдатыы Любовь Петровна элбэх сыллаах дьэрэкээн сибэккилэри, отонноох мастары үүннэриитин туһунан буолла. Любовь Петровна облепиха, моонньоҕон үс көрүҥүн, йошта, вишня икки көрүҥүн, рябинокизильник, жимолость, ирга, Роза ругоза, малина, рябина, бузина, уохта, долохуна, черемуха, сирень, яблоня, хаптаҕас, дөлүһүөн, ежемалина, крыжовник хаһааҥҥыттан үүннэрэн саҕалаабытын сырдатта.
Гастробыыстапканы ырыанан Авксентий Мординов аатынан Тааттатааҕы лиссиэй үһүс кылааһын үөрэнээччитэ, «Россия 24» ырыа күрэһин кыттыылааҕа Эрхаан Кузьмин киэргэтэн, сааскы настарыйыанньыны эбии көтөхтө.
Бу курдук минньигэс ас астааһына киһи айар кутун, дьоҕурун, олоххо кэрэлиин алтыһыытын киэҥник сырдатта.
-
2
-
0
-
0
-
0
-
0
-
0
