Фитнеһи Саха Сиринээҕи фитнес федерациятын бэрэсэдьиэнэ Лилия Дмитриева иилээн-саҕалаан ыытта. Салгыы Аполлинария Дегтярёва тус бренды хайдах сайыннарар туһунан сиһилии кэпсээтэ, саҥа дьону кытта хайдах толлубакка билсэргэ үөрэттэ. Ол кэннэ «Сделай брови» кэрэ көстүү салонун салайааччы кыргыттара: Визажист - Дайаана Баланова, баттах стилиһэ Саргылаана Васильева кэрэ буолуу кистэлэҥнэрин арыйдылар. Бүгүҥҥэттэн кыргыттар Сардана Порядина салайааччылаах «PRO MODELS» модельнай агенствотыгар сыанаҕа дефиленан хаамалларын дьарыктанан саҕалаатылар. Кыттааччылар үгүстэрэ аан маҥнайгыларын хобулук кэтэн модель буолан хаамтыбыт диэн билиммиттэрэ. Ол эрээри Сардана уонна кини хамаандатын профессиональнай уһуйааччыларын кытта кыргыттары аҕыйах чаас иһигэр эрэллээхтик хаамалларыгар үөрэттилэр. Мантан ыла кыттааччылары күүстээх репетициялар кэтэһэллэр.
Бу күн умнуллубат түгэнинэн «Аар Кудай» кэрэ куолара, далбар хотуттара Дьокуускай куорат приёмнай дьиэ кэргэттэрэ оҕо дьиэтиттэн иитэ ылбыт оҕолоругар анаан аһымал тэрээһиҥҥэ кыттыбыттара буолла. Кыттааччылар хас да бөлөххө арахсан мустубут оҕолору оонньоттулар, маастар кылаастары ыыттылар, ас астатан, уруһуйдатан, чугастык алтыһан, оҕолор үөрүүлэрэ үс бүк үрдээтэ. Хас биирдии хамаанда оҕолорго минньигэс бэлэхтэри, оонньуурдары туттардылар, тэрээһини күргүөмүнэн флешмоб үҥкүүнэн түмүктээтилэр. Оҕолор үөрбүт, махтаммыт чаҕылыспыт харахтарыттан кыргыттар бары да уйадыйдылар.
«Аар Кудай» кэрэ көстүү уонна духуобунас күрэҕин биир сүрүн титула «Аар Далбар» диэн хайысхаҕа улахан дьиэ кэргэн күн-күбэй ийэтэ, тулаайах хаалбыт оҕолору иитэр Жанна Александровна Нуриманова кытта сылдьар.
-- Бу күрэх сиэрдээх майгыны өрө тутарын иһин кыттарга санаммытым. Биһиги дьиэ кэргэҥҥэ 15 оҕолоохпут, онтон 3-һэ бэйэбит төрөппүт оҕобут. Улаатан истэхтэрин утаа оҕо иитэ ылар санаалаах этибит. Хомойуох иһин, ол кэмҥэ ыкса алтыспыт доҕотторбут тэҥҥэ олохтон соһуччу туораабыттара, 4 оҕо тулаайах хаалбыттара. Кэргэммин кытта сүбэлэһэн, доҕотторбут оҕолоро да буоллахтара, оҕолору бэйэбитигэр ылбыппыт. Ол кэннэ сатыыр эбиппит, табыллар эбит дии санаабыппыт. Бэйэм идэбинэн педагогпун, ол эмиэ көмө буолбута. "Приёмнай" төрөппүт оскуолатыгар элбэхтик үөрэнэн, араас вебинардары ааһан баран өссө оҕолору ыларга санаммыппыт. Бары наһаа үчүгэйдэр, истигэннэр, туйгуннук үөрэнэллэр. Нуучча, ньиэмэс, татар, мордвин о.д.а омук хааннаахтар. Ол да буоллар сахалыы итэҕэлгэ, айылҕаны харыстыырга, сиргэ-уокка сөпкө сылдьарг, үлэни таптыырга, дьоҥҥо-сэргэҕэ көрсүө-сэмэй буоларга иитэбит-үөрэтэбит. Түөрт улахан оҕобут номнуо улаатан, үөрэхтэрин бүтэрэн, Дьокуускайынан, Питеринэн, Москванан, Уфанан олороллор. 11 оҕобутуттан -- улахаттар оскуолаҕа үөрэнэллэр, 2 кырачаан- уһуйааҥҥа сылдьаллар.
Бу күрэххэ ис санаа, сиэрдээх майгы өттүттэн, Дьахтар, ийэ быһыытынан бэйэбин көрдөрөр сыаллаахпын. Төһө да элбэх оҕолоох буол, күннээҕи кыһалҕаҥ дьиэ-уот бүппэт үлэтэ да буоллун, дьахтар куруутун дьахтар буолуохтаах, үтүө санаатын, аламаҕай сыһыанын, истиҥ майгытын сүтэриэ суохтаах!
Уйгулаана ПОРТНЯГИНА
Хаартыска: Дмитрий Ляшеев
-
2
-
0
-
0
-
0
-
0
-
0
