Ох саанан ытыы көрүҥэ сайдар
Күрэххэ Бүтүн Арассыыйатааҕы таһымнаах судьуйа, СӨ үтүөлээх тириэньэрэ Борис Борисович Олесов судьуйалаата уонна санаатын маннык үллэһиннэ:
-- Бүгүн “Модун” успуорт уораҕайыгар оҕо аҕатынаан ох саанан ытыытын күрэҕэ саҥа сүүрээн быһыытынан ааста. Үс кыттаачы күөн көрүстэ, бары миэстэҕэ тигистилэр. Бастакы миэстэҕэ Эрсан Николаев таҕыста, иккис - Айсен Слепцов, үһүс – Леонард Захаров. Бу бастакы саҕалааһын буолан кыттааччы ахсаана аҕыйах диэн сыаналыыбын, эһиилгиттэн элбииллэрэ буолуо.
Оттон ох сааны оҥорооччу маастардар оҥоһуктарын тургутар түмүктүүр түһүмэхтэригэр ытыыга кииристилэр. Манна даҕатан эттэххэ, үгэс буолбут ох сааларын барытын куонкурус иитинэн саҥаттан оҥороллор. Былырыын оҥорбут оҥоһуктарынан киирсэллэрэ көҥүллэммэт. Быйыл кыттааччылар ахсааннара алта. Бэстибээл ыытыллыбыт икки күнүн устата ох сааларын оҥорон, ытарга сөптөөх, табыгастаах гына чочуйан баран үс сыалы таба ытыахтаахтар: “куобаҕы”, “куһу” уонна “тииҥи”. Ол түмүгэр Уус Алдантан сылдьар икки маастар икки бастакы миэстэлэргэ тигистилэр. Семен Орлов алта ытыыттан 10 очукуону ылан бастаата. Иккис миэстэҕэ Роман Готовцев таҕыста. Үһүс миэстэҕэ Чурапчыттан Попов Павел.
Сахабыт Сиригэр үгэс буолбут ох саанан ытыы көрүҥэ бүтэһик сылларга күүскэ сайдар. Федерация ыытар Өрөспүүбүлүкэ таһымнаах күрэхтэһиилэригэр кыттыан баҕалаахтар ахсааннара элбэҕиттэн, хааччахтары киллэрэргэ күһэлиннибит. Ол курдук, биир улуустан кыттааччы ахсаана 18 киһиттэн элбиэ суохтаах диэн. Маннык хааччах киирэ илигинэ, биир улуустан сааһыттан тутулуга суох, 40-50 киһи кыттарга сайаапкалыыра. Бу күннэргэ Тааттаҕа өрөспүүбүлүкэ таһымнаах үгэс буолбут ох саанан ытыы федерациятын "Чороон" диэн кубогын күрэхтэһиитэ бара турар. Бу күрэхтэһиибитин 2019 сылтан ыытабыт. Быйыл 27 улуустан 325 спортсмен күөн көрсөр. Былырыын тэрээһиммит Чурапчыга ыытыллыбыта.
Эрсан Николаев - күрэх маҥнайгы кыайыылааҕа
Кыра оҕолорго ох саанан ытыы күрэҕин кэнниттэн, кыайыылаах Эрсан дьонун кытары кэпсэттим. Аҕата Айтал Николаев билиһиннэрбитинэн, эдэр ыал Намтан сылдьаллар, икки оҕолоохтор. Эрсан дьиэ кэргэн улахан оҕото, бастакы кылааска үөрэнэр, балтыта биир сыл балыс.
-- Эрсан ох саанан ытыыга соторутааҕыта дьарыктанан саҕалаата. Маныаха Намҥа тириэньэрдээхпит. Ох саабытын маастар Роман Ильич Готовцев маастар-кылааһыгар дьарыктанан оҥорбутум.
Күрэхтэһиигэ кыттыбыт оҕолорго Ил Түмэн бэрэссэдээтэлин маҥнайгы солбуйааччыта Александр Николаевич Жирков бэртээхэй өйдөбүл бэлэх – кинигэ-каталог туттарда. Бу биһиги оҕолорбут улааталларыгар, инникитин култуурабытын, саха норуотун ханнык улуу оҥоһуктара аан дойду түмэллэригэр харайылла сыталларынан билсэллэригэр, бэйэбит норуоппут култууратынан киэн тутталларыгар олук буолуо диэн эрэнэбит, -- диэн аҕа киһи кэпсээтэ.
Санатан эттэххэ, кулун тутар 14-15 күннэригэр ыытыллыбыт «Мас уустарын тойуга» III Өрөспүүбүлүкэтээҕи бэстибээл-күрэх Саха Сиригэр Култуура сылыгар уонна Арассыыйа, Саха Сирин норуотун маастара, «Саха Өрөспүүблүкэтин култууратын үтүөлээх үлэһитэ», П.А. Ойуунускай аатынан Судаарыстыбаннай бириэмийэ лауреата, Таатта улууһун Бочуоттаах гражданина Эрнест Александрович Алексеев төрөөбүтэ 80 сылыгар ананна.
Ааптар хаартыскаҕа түһэриилэрэ.
-
1
-
0
-
0
-
0
-
0
-
0
