“Өлбөт үйэлээх полк” аахсыйаҕа Ил Түмэн бэрэссэдээтэлэ Алексей Еремеев кыттыыны ылла. Кини бэлиэтээбитинэн бу дойдуга бэриниилээх буолууну сэргэ, норуоппут духуобунаһын арылыччы көрдөрөр хатыламмат аахсыйа.
– Аҕа дойду Улуу сэриитэ 27 мөлүйүөн сэбиэскэй кыраасданнар олохторун суорума суоллаабыта, хас биирдии дьиэ кэргэни хаарыйан ааспыта. Биһиги Сахабыт Сириттэн 62 тыһыынча киһи ыҥырыллыбыта, олортон 30 тыһыынчаттан тахсата төннүбэтэхтэрэ. Тыылга аччыктааһынтан, араас ыарыыттан 60 тыһыынча кэриҥэ киһи сырдык тыына быстыбыта. Ити курдук, сэбиэскэй норуот улахан сүтүгү көрсүбүтэ. Онон бу күн Кыайыыны аҕалбыт, Ийэ дойду көҥүлүн туһугар олохторун толук уурбут дьоннорун мэтириэттэрин тутан кэккэлээн хаампыттар норуот самныбат санаатын көрдөрөллөр. Биир сомоҕо норуоту ким да кыайбат, бу улуу держава! Оннук дойдунан Арассыыйа Федерацията буолар. Мин хаан-уруу абаҕам Еремеев Алексей мэтириэтин тутан таҕыстым. Кини холкуос бэрэссэдээтэлин быһыытынан броньнаах эрээри, бэйэтин баҕа өттүнэн барбыт, Сталинград таһынааҕы кыргыһыыга охтубут. Оҕолорум эмиэ хаамтылар, уолум Курскай Тоҕой кыргыһыытыгар өлбүт абаҕам мэтириэтин, кыыһым эһэбит, мин аҕам, тыыл бэтэрээнин хаартыскатын илдьэ сырытта, -- диэтэ Алексей Еремеев.
Хаартыска: Ил Түмэн пресс-сулууспата
-
0
-
0
-
0
-
0
-
0
-
0