Бу күн мустубут дьоҥҥо аралдьыйыы арааһын көрдөрдүлэр, оҕолорго, улахан дьоҥҥо, аҕам саастаахтарга бэрт табыгас сынньалаҥы тэрийдилэр: күрэхтэһиилэр, норуот оонньуулара, быыстапкалар, үгэс буолбут аһынан күндүлээһин.
“Татаардар олбуордарын” оҥоһуктара, култуураны арыйар киэҥ ис хоһоонноох кэпсээннэрэ мустубут ыалдьыттары сөхтөрдө. Маныаха тэрийээччилэри кытары сэһэргэһэн билсибиппэр, тутуу мастарын Татарстантан ыам ыйыгар ыыппыттар. Манна, Дьокуускайга сүрүн тутуу үлэтэ баран, бэртээхэй көстүүлээх экспозияция туруоруллубут.
Ыалдьыттары Татарстантан хомуллубут отунан оҥоһуллубут, 300 лиитэрэ иэннээх самоварга кыынньыбыт итии чэйинэн күндүлээтилэр. Улахан казаннарга буспут шурпанан, чак-чагынан уонна эчпочмактарынан айах туттулар. Ол курдук түөрт тыһыынчаттан тахса порция тарҕанна!
Ыалдьыттар култуура уонна сынньалаҥ пааркатыгар норуот оонньууларыгар буор босхо кыттан бириис арааһын туттулар. Ньуоскаҕа сыммыыттаах сүүрүү, куулу кэтэн баран ойуоккалааһын, кууллаах отунан охсуһуу...
“Туймаада” стадиоҥҥа корэш уонна мас тардыһыыга күрэхтэһиилэр олус тыҥааһыннаахтык аастылар. Мас тардыһыытыгар 20 спортсмен кыттыыны ылла. Муҥутуур кыайыылаах Дьулустан Ноговицын Ил Дархан туруорбут 1,8 мөл солкуобай суумалаах хаарынан, болуотанан айанныыр «Рысь 3 Пикап» вездеходунан наҕараадаланна. Иккис миэстэҕэ Павел Черноградскай, үһүс бочуоттаах миэстэҕэ Владимир Никитин уонна Егор Атласов таҕыстылар.
Корэш күрэхтэһиигэр, Кыргызтантан, Саха Сириттэн, Тюмень уобалаһыттан уонна Татарстантан спортсменнар кииристилэр. Манна кыайыылааҕынан успуорт маастара, Татарстан элбэх төгүллээх чемпионаттарын уонна турнирдарын кыайыылааҕа Радик Салихов буолла, Татарстан аҕа баһылыга туруорбут бирииһин -- «Лада Гранта» массыынаны бэлэх тутта. Физическай култуура уонна успуорт миниистирэ Леонид Спиридонов таба бэлэх уунна.
Галина МАТВЕЕВА
Ааптар хаартыскаҕа түһэриилэрэ
-
0
-
0
-
0
-
0
-
0
-
0
