Бу кэнниттэн Айсен Николаев СӨ норуоттарын IX Спортивнай оонньууларын тэрийэр өрөспүүбүлүкэтээҕи хамыыһыйа көһө сылдьар киэҥ ыҥырыылаах сүбэ мунньаҕын салайан ыытта. Ньурба улууһун инники сайдыытыгар сүҥкэн суолталаах улахан тэрээһиҥҥэ бэлэмнэнии үлэтин хаамыытын сиһилии дьүүллэстилэр.
Түмүккэ Айсен Сергеевич сонуннары киэҥник тарҕатар сириэстибэлэргэ интервью биэрдэ:
-- 2027 с. от ыйыгар Ньурбаҕа СӨ норуоттарын IX Спортивнай оонньуулара буолуохтаахтар. Бэлэмнэнии үлэтэ элбэх хайысханан бара турар. Спорт өттүн этэр буоллахха, билигин сүүмэрдиир күрэхтэһиилэр өрөспүүбүлүкэҕэ номнуо саҕаланнылар. Спорт министиристибэтинэн спорт көрүҥнэринэн бырагыраама оҥоһуллан, барыта ол быһыытынан ыытылла турар. Ньурбаҕа 3500 спортсмен кэлэрэ күүтүлэр. Ол иһин хаһааҥҥытааҕар даҕаны улахан Оонньуулар буолуохтара диэн күүтэбит.
Элбэх хайысханан тутуу үлэтэ барар. Саамай улахан спортивнай эбийиэктэринэн 3000 киһи миэстэлээх, сылаас легкоатлетическай манежтаах стадион уонна бассыайыннаах Физкултуурунай-чэбдигирдэр комплекс буолаллар. Ити икки эбийиэккэ бэдэрээтчит үлэтин саҕалаан, бэрт үчүгэйдик үлэлии сылдьар. Үп-харчы туһунан этэр буоллахха, сүрүннээн харчыта быһаарыллан турар. Сорох тиийбэт харчытын 2026 уонна 2027 сс. өрөспүүбүлүкэ бүддьүөтүттэн үбүлүүргэ бырабыыталыстыбаҕа бүгүн сорудах биэрдим.
Атын өттүнэн, эмтиир куорпус тутуута бытааннык барара миигин сүрдээҕин долгутар. Бу эбийиэк хайаан даҕаны үлэҕэ киириэхтээх, Ньурба улууһун доруобуйа харыстабылыгар улахан наадалаах эбийиэк. Ол иһин хайаан даҕаны 2026 с. тутааччылар бүтэрэн үлэҕэ киллэриэхтэрин наада. Онно билигин сөптөөх сорудахтар тиэрдилиннилэр.
Ону таһынан элбэх эбийиэктэргэ, уулуссалары, суоллары, муосталары тутуу боппуруостарыгар тохтоотубут. Барыларыгар сөптөөх быһаарыылар ылылыннылар. Ол иһин мин СӨ норуоттарын IX Спортивнай оонньуулара этэҥҥэ үрдүк таһымнаахтык ыытыллан, Ньурба улууһун, Ньурба куоратын бүттүүн сайдыытыгар улахан төһүү буолуохтара диэн эрэнэбин.
Геннадий АНТОНОВ
-
0
-
0
-
0
-
0
-
0
-
0
