Общество

Дмитрий Тихонов сыл устата ыытыллыбыт үлэ-хамнас сүрүн көрдөрүүлэрин улахан экрааҥҥа көрдөрөн, ааспыт сыллары кытта тэҥнии тутан, сиһилии сырдатта. Бу кэннэ Ил Түмэн норуодунай дьокутаата Андрей Находкин нэһилиэнньэҕэ 33-с Федеральнай сокуоҥҥа киирбит уларытыылары  билиһиннэрдэ.

Томтор нэһилиэгин бочуоттаах олохтооҕо, үлэ бэтэрээнэ Федот Богимов гаас хаһан киириэй, нэһилиэк баһылыгын нэһилиэк талар кыахтаах дуо, өртөөһүҥҥэ боппуруос хайдаҕый, военкоматтан тоҕо отчуокка кыттыбаттарый диэн ыйытыктарыгар Дмитрий Иванович уонна Андрей Михайлович хоруйдаатылар. Федот Никитич кэлэр үс сыл Оҥорон таһаарыы сылларынан биллэриллибитэ үчүгэйин, ас-үөл боппуруоһун быһаарарга нэһилиэккэ баар тыа хаһаайыстыбаларын нөҥүө үлэлиир астыыр-үөллүүр сыахтаах муниципальнай тэрилтэ тэрийэргэ этии киллэрдэ.

Сылгынан бааһынай хаһаайыстыба салайааччыта Давид Гаврильев тыа хаһаайыстыбатыгар оҕолору кыра саастарыттан сыһыарарга агро оскуолаларга туох үлэ барарын ыйытта. Киниэхэ үөрэх управлениетын салайааччы Ирина Плотникова улууска баар сэттэ агро оскуолалар бары ити хайысхаҕа күүскэ үлэлииллэрин эттэ. “Томтор” ХЭУо бэрэссэдээтэлэ Денис Жирков атырдьах ыйыттан үүт харчыта кэлэ илигин, иккис аныгылыы хааччыллыылаах хотоно үлэҕэ киирбитин, барыта 200 ынах сүөһүлээҕин, онтон 120-тэ ыанар ынах буоларын, “Агроэксперт” тэрилтэни кытта үлэлэһэрин, бэйэ аһын-үөлүн оҥорон таһаарыыга кыах баарын, онно сыах арыйарга көмөҕө наадыйарын эттэ. Улуус чиэһин көмүскүүр спортсмен оҕолорго туох көмө оҥоһулларый диэн төрөппүт ыйытта.

Киирбит ыйытыктарга туһааннаах управлениелар, тэрилтэлэр салайааччылара толору хоруйдары биэрдилэр.

Түмүккэ, Мирон Анатольевич оҕо уһуйааныгар, оскуолаҕа хапытаалынай өрөмүөҥҥэ, сылгы күрүөтүн оҥорууга көмө көрүллэригэр, кэлэр сайын Сайылык күнүн Күтэрдээх сайылыкка ыытарга, муниципальнай суолга өрөмүөнннүүр үлэ сыллата оҥоһулларыгар этиилэрин киллэрдэ.

Дмитрий Иванович ааспыт сылга  нэһилиэнньэттэн алта боппуруос турбутуттан үһэ туолбутун, үһэ үлэҕэ сылдьарын эттэ. “Анал байыаннай дьайыыга сылдьар биир дойдулаахтарбытыгар хас биирдиигит туох кыалларынан көмөлөспүккүтүгэр сүһүөхтээх бэйэм сүгүрүйэн туран махтанабын. Кэлэр сылга эйэлээх халлааны, этэҥҥэ буолууну баҕарабын. Куруутун түмсүүлээх буолуоҕуҥ”, — диэн түмүктээтэ.

Отчуоту истэ 51 олохтоох кэлбит.

Сонун төрдө уонна хаартыска: "Эркээйи", Марелла Баишева.