16:00 чааска «Патриот» ыччат киинигэр «Жить во славу Отечества» патриотическай марафон саҕаланыаҕа. Тэрээһин Арассыыйа норуоттарын сомоҕолоһууларын, гражданскай эппиэтинэс уонна патриотизмы иҥэрэр сыаллаах, Арассыыйа Федерациятын суолталаах историческай түбэлтэлэрин тула санаалары түмэн ыытыллар.
17:00 чаастан А.Е. Кулаковскай аатынан норуоттар доҕордоһууларын дьиэтин мрамор саалатыгар Арассыыйа норуоттарын сомоҕолоһууларын сылын чэрчитинэн ыытыллар «Арассыыйа — дьиэ кэргэн ыала» диэн бүтүн дойду үрдүнэн сырдатар аахсыйа-дьыктаан буолар.
Саха Өрөспүүбүлүкэтин тас сибээстэргэ уонна норуоттар дьыалаларыгар министиэристибэтэ иһитиннэрбиттэринэн, аахсыйа-дьыктаан тиэкиһэ бэрэсидьиэммит Владимир Путин дойду күүһүн, биир сомоҕо буолуутун уонна сыаннастарын көрдөрөр этиилэринэн оҥоһуллубут.
«Аахсыйа нуучча тыла судаарыстыбаны үөскэтэр тыл уонна омуктар икки ардыларынааҕы алтыһыы тылын, Россия норуоттарын тылларын киэҥник тарҕатыыга, ону тэҥэ гражданскай эйэни, сөбүлэһиини бөҕөргөтүүгэ туһуланар», – диэн биэдэмистибэҕэ бэлиэтээтилэр.
Санатан эттэххэ, кулун тутар 18 күнүгэр 2014 сыллаахха Арассыыйа бэрэсидьиэнэ Владимир Путин, Крым Өрөспүүбүлүкэтин Үрдүкү Сэбиэтин баһылыга Владимир Константинов, Крым Өрөспүүбүлүкэтин премьер-миниистирэ Сергей Аксенов уонна Севастополь куорат сэбиэтин бэрэссэдээтэлэ Алексей Чалый Арассыыйа Федерациятыгар Крым Өрөспүүбүлүкэтин ылыы, саҥа субъектары тэрийии туһунан дуогабарга илии баттаабыттара.
Ил Дархан, «Биир Ньыгыл Арассыыйа » баартыйа Саха Сирин эрэгийиэннээҕи отделениетын сэкиритээрэ Айсен Николаев Ил Түмэҥҥэ анал туһаайыытыгар уопсастыба сиэргэ-майгыга иэһэ — оҕолору төрөөбүт дойдуга таптал, бэринии сөптөөх сыаннастардаах улаатыннарыы буоларын тоһоҕолоон бэлиэтээбитэ: «Бу сиэрдээх буолуу өрөгөйүн көрдөрөр бырааһынньык биһиэхэ дойду саҥа историятыгар эпохальнай түбэлтэни санатар. Крым олохтоохторо референдумҥа Российскай Федерация састаабыгар киириини, историческай дойдуларыгар төннүүнү туһугар турууласпыттара. Кинилэр көҥүл санаалара иһиллибитэ, сокуоннай куоластааһын түмүгүнэн дойду президенэ Владимир Владимирович Путин ыйааҕынан Крым сувереннай уонна тутулуга суох диэн билиниллибитэ, онтон биһиги дойдубут састаабыгар киирбитэ».
Сонун төрдө уонна хаартыска: СИА.
-
0
-
0
-
0
-
0
-
0
-
0
