Сахабыт Сирин биир сүрүн судаарыстыбаннай бырааһынньыгар өрөспүүбүлүкэбит историятыгар суолларын хаалларбыт бэлиэ түгэннэри ахтабыт. Ол ыарахан кэмнэргэ бэйэлиригэр үрдүк эппиэтинэһи сүкпүт чулуу дьоммутун ахтар, сүгүрүйэр күммүт. Саха Өрөспүүбүлүкэтин судаарыстыбаннаһын төрүттэспит уһулуччулаах бэлитиичэскэй уонна судаарыстыбаннай диэйэтэл Исидор Никифорович Барахов Максим Аммосовтыын, Платон Ойуунускайдыын, Степан Аржаковтыын, Степан Васильевтыын өрөспүүбүлүкэ төрүттэниитигэр, Саха Сирэ социальнай-экэнэмиичэскэй сайдыытыгар сүҥкэн кылаатын киллэрсибитэ.
Кэлин, 1992 сыллаахха эмиэ бу кэмҥэ аныгы Конституция ылыллыбыта, Саха Сирэ модун Арассыыйаҕа субьект быһыытынан киирбитэ.
Тэрээһини ыытааччылар Исидор Никифорович олоҕун төрөөбүт өрөспүүбүлүкэтин, Саха Сирин дьонун интэриэстэрин көмүскээһиҥҥэ анаабытын санаттылар. Өрөспүүбүлүкэни төрүттээччилэр эр санааларынан, дьулуурдарынан, норуоттарын туһугар үрдүк эппиэтинэстээхтэринэн биллэллэрэ. Уустук дьүүллэһиигэ, мөккүөргэ, бэл, кытаанах утарылаһыыга, харгыстаһыыга кинилэр туруулаһан, автономнай өрөспүүбүлүкэ статуһун ылары ситиспиттэрэ диэн бэлиэтээтилэр.
Маны сэргэ, бу күн РФ Дьоруойа, «Медведь» позывнойдаах Алексей Рафаэлович Петров сырдык тыына быстыбытынан биир мүнүүтүлэээх курутуйуу биллэрилиннэ, аймахтарыгар, чугас дьонугар, доҕотторугар, биир дойдулаахтарыгар, бойобуой табаарыстарыгар кутурҕан биллэрилиннэ. Кини ураты хорсун, күүстээх санаалааҕын, хорсун-хоодуот байыас табаарыстарыгар, төрөөбүт дойдутугар бэриниилээҕин көрдөрбүтэ диэн эттилэр.
-
1
-
0
-
0
-
0
-
0
-
0
