Георгий Степанов тыл этэригэр Исидор Барахов дьылҕата Саха Сирин сайдыытын устуоруйатын кытта ыкса сибээстээх, норуотун олоҕо тупсарыгар киллэрбит кылаатын сыаната муҥура суох диэн эттэ.
Саха АССР судаарыстыбаннаһын Исидор Барахов төрүттэспит киһи буоларын санатта: “Бүгүн биһиги Өрөспүүбүлүкэбит биир саамай үтүө, улуу күнүн бэлиэтиибит. 34 сыл аннараа өттүгэр бу күн Саха автономнай өрөспүүбүлүкэтин үрдүкү сэбиэтин дьокутааттара декларация ылынан, 21-с үйэҕэ Сахабыт Сирин норуота, дьоно-сэргэтэ туруктаах сайдыылаах уонна инникигэ кэскиллээх буолалларыгар олук уурбуттара. Бу күҥҥэ улахан сабыдыалы оҥорбут, бэйэтин өйүнэн-санаатынан, үлэтинэн-хамнаһынан дойдутугар, норуотугар бэриниилээҕинэн биллэр бастакы бэрэсидьиэммит Михаил Ефимович Николаев буолар. Кини сырдык сырдык ыра санаата, ырааҕы өтө көрөр өйө, дьонун-сэргэтин туһугар уҕараабат кыһамньыта бүгүҥҥү олохпут кэскилэ, олохпут олуга буолар. Ол курдук 34 сыл аннараа өттүгэр дойдубут баар, эбэтэр суох, биир кэлим буолара тыҥаһыннаах боппуруос буолан турбут кэмигэр улахан быһаарыныы ылыллыбыта.
Ити барыта ол эрэ күн иһигэр үөскээбэтэҕэ, ааспыт үйэ 20-с сылларыгар саҕаламмыта. Саха чулуу уолаттара Максим Аммосов, Былатыан Ойуунускай уонна биһиги бүгүн кэриэстээн, ытыктаан, сүгүрүйэн турар саха саарына Исидор Барахов мустан, өйдөрүн түмэн, биир санаанан салайтаран Саха өрөспүүбүлүкэтэ автономнай буоларыгар, судаарыстыбаннай статус ыларыгар үлэлээбиттэрэ. Ити кэмнэргэ туруорсуулара дьиҥинэн хорсун быһыы. Бары ааспыт үйэ 30-с, 50-с сылларыгар саха интеллегенцията хайдах суорума суолламыттарын билэбит. Кинилэр онтон чаҕыйан, толлон турбатахтара, норуоппут инникитин санаан сүҥкэн быһаарыы ылыммыттара. Ол суолтатын биһиги ыччаппытыгар өйдөтөр тустаахпыт. Маннык тэрээһиннэр сыл аайы тиһигин быспакка бара туралларыттан үөрэбин”, - диэн туран Өрөспүүбүлүкэ салататын аатыттан мустубуттары эҕэрдэлээтэ, инникигэ эрэллээх, кэскиллээх буолуохха диэн ыҥырда.
Ил Түмэн дьокутаата Иван Луцкан мустубуттары Судаарыстыбаннас күнүнэн эҕэрдэлээтэ: “Бүгүн манна мустубут ыччакка Исидор Барахав чэпчэкитэ суох дьылҕатыттан сырдатыам этэ. Саха Сирин автономията тэриллэригэр, ааспыт үйэ 20-с сылларын саҕаланыытыгар, кини больщевиктар бүтүн сойуустааҕы бэлитиичэскэй баартыйаларыттан соҕотох быһаарар куоластаах дэлэгээт этэ. Кинини кытары кыттыыны ылбыт Былатыан Ойуунускай сүбэлэһэр куоластааҕа. Бу быһаарыы түмүгэр, Сахабыт Сирэ 100 сылтан ордук автономнай өрөспүүбүлүкэ буолар. Бэйэбит тылбытын, бырамыысаланнаспытын о.д.а. сайыннарар, Сахабыт Сирэ сайдыытыгар саҥа усулуобуйалары тэрийэр кыахтаахпыт.
Исидор Никифорович өрүү норуотун интэриэһин инники күөҥҥэ тутара. Кини олоҕун суола баара-суоҕа 40 эрэ сыл буоллар, оҥорбут үтүөтэ үйэлэргэ хаалла”, - диэн туран үтүө дьыала умнуллубатыгар, Сахабыт Сирэ иннин диэки баран иһэригэр, сайдарыгар баҕарда.
Манна даҕатан эттэххэ, бэҕэһээ, балаҕан ыйын 26 күнүгэр Исидор Барахов мэҥэ тааһыгар кини төрөөбүт сиригэр — Үөһээ Бүлүү Харбалааҕар сүгүрүйдүлэр. Манна кини аатынан ааттаммыт, саҥа аспаалламмыт уулуссаны үөрүүлээх быһыыга-майгыга арыйдылар. Былырыыҥҥыттан ыла 600 м уһуннаах сиргэ үлэ барбыт.
Харбалаах нэһилиэгэр Исидор Барахов аатынан Култуура киинэ тутулла турар. Бу сыл бүтүөр диэри тутуллан бүтүөхтээх диэн Ил Дархан, бырабыыталыстыба дьаһалтатын пресс-сулууспата иһитиннэрэр.
-
0
-
0
-
0
-
0
-
0
-
0
