Вячеслв Володин MAX ханаалыгар санаппытынан, 2025 сыл атырдьах ыйын 11 күнүгэр Арассыыйа Федерациятын ылыллыбыт гражданствотын тохтотор төрүөттэр испииһэктэрин кэҥэппит федеральнай сокуон (2025 с. от ыйын 31 күнүнээҕи 316 №-дээх ФС) күүһүгэр киирбит. «Бу — Арассыыйа гражданствотын ылан баран, ыарахан холуобунай буруйу оҥорбут дьоҥҥо сыһыаннаах», — диэн кини бэлиэтээтэ.
Бэрэссэдээтэл этэринэн, үөһэ ааттаммыт сокуон ылыллыбытын кэнниттэн гражданствоны тохтотор төрүөт ахсаана 80-тан таҕыста. Испииһэккэ киирэллэр:
- өлөрүү;
- эр-ойох буолуу сокуонун кэһии;
- күһэйиини эбэтэр куттааһыны туттан, сокуоннайа суох проституциянан дьарыктанар сири тэрийиигэ туһуламмыт дьайыылар, ону тэҥэ сокуоннай саастарын ситэ илик оҕолору туһаныы;
- сокуоннай саастарын ситэ илик оҕолор порнографическай ойуулаах матырыйааллары оҥоруу уонна эргитии, ону тэҥэ сокуоннай саастарын ситэ илик оҕолору ити сыалга туһаныы;
- конституционнай тутул уонна судаарыстыба куттала суох буолуутун утары буруйдар;
- сокуоннайа суох миграцияны тэрийии;
- экстремистии биричиинэнэн эбэтэр терроризмы, диверсияны бигэргэтэр сыаллаах ханнык баҕарар атын буруйу оҥоруу.
Вячеслав Володин иһитиннэрэринэн, РФ ИДьМ 2026 сыл ыам ыйынааҕы дааннайынан, Арассыыйа гражданствотын туһунан саҥа сокуон (2023 с. муус устар 28 күнүнээҕи 138 №-дээх ФС) күүһүгэр киириэҕиттэн 4500-тэн тахса киһи гражданствота тохтотуллубут:
3000-тан тахса — холуобунай буруйдарын иһин суут бириигэбэрин түмүгүнэн;
400-тэн тахса — байыаннай учуокка турбатахтарынан сибээстээн;
300-чэ — дойду куттала суох буолуутугар дьайыылары оҥорбуттарын быһаарыы түмүгэр.
Маныаха быһаарыы 40 бырыһыана бүтэһик сылга тиксэр диэн эбэн эттэ Вячеслав Володин.
«Бу барыта саҥа нуормалар быраабы араҥаччылыыр уорганнарга миграция эйгэтигэр бэрээдэги олохтуурга өссө элбэх кыаҕы биэрбиттэрин көрдөрөр, — диэн Госдуума Бэрэссэдээтэлэ бэлиэтээтэ. — Арассыыйа Федерациятын гражданина буолуон баҕалаахтар ДОЙДУНУ КӨМҮСКҮҮР ЭБЭҺЭЭТИЛИСТИБЭ СҮГҮӨХТЭЭХТЭР, СОКУОННАРБЫТЫН ТУТУҺУОХТААХТАР, ону тэҥэ НУУЧЧА ТЫЛЫY БИЛИЭХТЭЭХТЭР, КУЛТУУРАҔА УОННА ҮГЭСТЭРГЭ ЫТЫКТАБЫЛЛААХТЫК СЫҺЫАННАҺЫАХТААХТАР».
Хаартыска: Госдуума саайта
-
0
-
0
-
0
-
0
-
0
-
0
