Атырдьах ыйын 25–26 күннэригэр куорат былаһааккаларыгар сүүһүнэн көхтөөх дьон — кэмиэрчэскэйэ суох тэрилтэлэр, волонтердар уонна өрөспүүбүлүкэ актыыбынай олохтоохторо муһуннулар. Быйылгы көрсүһүү Саха Сирин Уопсастыбаннай палаататын 15 сылыгар ананар.
Пуорум тиэмэтэ билигин ордук тоҕоостоох: “Гражданскай уопсастыба: аныгы тургутуулар усулуобуйаларыгар сомоҕолоһуу”.
«Маннык былаһааккалар саҥа бырайыактары уонна быһаарыылары киллэрэр туочуканан буолаллар, ол Саха Сиригэр олоҕу тупсарар», — диэн өрөспүүбүлүкэ бырабыыталыстыбатын бэрэссэдээтэлин солбуйааччы Ольга Балабкина бэлиэтээбитэ.
Бүгүн, атырдьах ыйын 25 күнүн бырагыраамата, туттууга-хаптыыга наадалаах сатабылларга ананар. “Точка кипения” былаһааккаҕа эспиэрдэр 2026 сыллааҕы грант кыахтарын туһунан сиэссийэни ыыталлар. Кыттааччылар сайаапканы толорууга ордук элбэхтик тахсар алҕастары ырытан, социальнай эйгэҕэ аныгы технологиялар хайдах көмөлөһөллөрүн билсэллэр. Биир социальнай бырайыактарга искусственнай интеллеги хайдах туһанары быһааран биэриэхтэрэ.
Бүгүн эбиэт кэнниттэн, уопсастыбаннай кииҥҥэ уопсастыбаннай кэтээн көрөөччүлэри үөрэтии саҕаланыаҕа.
Киин күнүнэн атырдьах ыйын 26 күнэ буолуоҕа. Сарсыарда 09:00 чаастан 13:00 чааска диэри үлэ уопсастыба сүрүн көрдөбүллэрин көрдөрөр биэс хайысханан барыаҕа:
«Култуура уонна үөрэхтээһин — социальнай сайдыы сүрүн үнүстүүтэ»;
«Бииргэ — Кыайыыга: байыаннай дьайыы кыттыылаахтарыгар уонна кинилэр дьиэ кэргэттэригэр көмө бастыҥ быраактыкалара»;
«Оҕолоох дьиэ кэргэттэри өйөөһүн — демографическай бэлиитикэ ситиһиитин мэктиэтэ»;
«Чэгиэн көлүөнэ уонна уһун үйэлэнии сыаннаһа»;
«Уопсастыба туһатыгар уопсастыбаннай сэбиэттэр».
Байыаннай дьайыы кыттыылаахтарын өйөөһүҥҥэ уонна төрүт сыаннастарга ураты болҕомто ууруллуо, бу гражданскай уопсастыба уонна дойду инники күөҥҥэ тутар сыалларын быстыспат ситимин бэлиэтиир.
Икки күннээх үлэ түмүгүнэн пленарнай мунньах буолуоҕа, ол Уопсастыбаннай кииҥҥэ күнүс 14:00 чаастан саҕаланыаҕа. Манна тэрийээччилэр бары былаһааккалартан этиилэри түмүөхтэрэ. Пуорум сүрүн докумуонунан быраактыкаҕа туһалаах сүбэлэрдээх түмүк резолюция буолуоҕа, кини салгыы уопсастыбанньыктар үлэлэрин төрдө буолуоҕа.
Олохтоохторго пуорум — бу кэпсэтии былаһаакката эрэ буолбатах. Бу — эспиэрдэртэн быһа сүбэни-аманы ылар, социальнай көҕүлээһиннэргэ эрэллээх партнердары булар уонна төрөөбүт дойду сайдыытыгар тус кылааты киллэрэр кыах.
Хаартыска: Галина МАТВЕЕВА
-
0
-
0
-
0
-
0
-
0
-
0
