Абый улууһуттан сылдьар дэлэгээт Мария Мартынова бу курдук кэпсиир:
— Өрөспүүбүлүкэбит араас муннугар интэриэһинэй, дьону көҕүлүүр, туһалаах бырайыактар араас граннарга олоҕуран үлэҕэ киирэллэр. Бу ордук үп кырыымчык, бүддьүөт үбүлээһинэ сарбылла турар кэмигэр туһалаах. Граннарынан киирсэн, үбүлэнэн сайдыы суолугар үктэнэбит, араас култуурунай уонна социальнай тэрээһиннэри граннарынан ыытарга бары даҕаны үөрэнэбит.
Бэйэбит уопуппут туһунан кэпсээтэххэ, былырыын күһүн Белай Гора социальнай-култуурунай киинин кытары грант суруйан холоммуппут. Биллэр мусукаан, композитор, ырыаһыт Олег Черемкин – Өлүөкэ Кубалы үбүлүөйдээх сылыгар анаммыт үлэ этэ. Баалбыт улахан эрээри, сатаан хапсыбатахпыт. Ол да буоллар, самныбакка салгыы өссө иккис граҥҥа биэрбиппит.
Манна даҕатан эттэххэ, Аартыка улуустарыгар исписэлиистэр тиийбэттэр, айан ороскуота үрдүк, онон бэйэлэрин ис сүрэхтэриттэн интэриэһиргиир актыбыыс дьон эрэ кэлэн маннык куурустарга үөрэнэр, билиитин хаҥатар, холонон көрөр. Ону сэргэ, пуорумҥа кэлэн эспиэрдэри истии, атын улуустартан уопут атастаһыы, билии хаҥатыы туохха да тэҥнэммэт буоллаҕа.
Дьиҥинэн, Аартыкаҕа уратыбыт элбэх: култуурабыт, айылҕабыт, дьоммут-сэргэбит. Ону таба тайанан, сөптөөхтүк киирсиэххэ наада эбит.
Граннары таһынан нассынаалынай бырайыактар улахан көмөнү оҥороллор диэн бэлиэтиэм этэ. Холобур, «Дьиэ кэргэн» нассынаалынай бырайыагынан улуус киинигэр Муусука оскуолатыгар улахан хапытаалынай өрөмүөн былырыын ыытыллыбыта. Бу эмиэ биһиги улууспутугар ситиһии.
Ааптар хаартыскаҕа түһэриитэ
-
0
-
0
-
0
-
0
-
0
-
0
