Саха Өрөспүүбүлүкэтин Судаарыстыбаннай Мунньаҕын (Ил Түмэн) вице-спикерэ Александр Подголов бүгүн Дьокуускай куорат 13-с нүөмэрдээх орто оскуолатын үөрүүлээх линейкатыгар кытынна.
— Мин балаҕан ыйын 1 күнүгэр аналлаах үөрүүлээх линейкаларга мэлдьи үөрэ-көтө барабын. Быйыл мин 13-с №-дээх оскуолаҕа сырыттым. Маҥан ырбаахылар, фартуктар, баантыктар, букеттар уонна «Билии дойдутугар айан» туһунан истиҥ тыллары истэр олус үчүгэй. Ол эрээри, билиҥҥи кэмҥэ оскуола оҕоҕо билиини эрэ биэриинэн муҥурдаммат.
Билигин информация — саамай судургу мал. Ахсаан табылыыссатын, англия тылын эбэтэр былыргы Риим устуоруйатын репетитордыын да, оҥоһуу өй көмөтүнэн да дьиэҕэ үөрэтэр кыах баар. Оттон атын дьону кытары бииргэ алтыһарга, эйэлээхтик олорорго үөрэтиини киһи соҕотоҕун ылбычча баһылаабат.
Бүгүҥҥү оскуола — бу сүҥкэн социальнай эрчиллэр сир (тренажёр). Манна оҕо аан бастаан ардыгар ыарахан чахчылары билэр: учуутал киниэхэ болҕомтотун барытын уурар кыаҕа суох, доҕоро буолуон баҕарбат оҕо баар буолуон сөп, паартаҕа бииргэ олорор табаарыһа мэһэйдиэн сөп. Ким эрэ эйигиннээҕэр садаачаны түргэнник суоттуур, ким эрэ түргэнник сүүрэр...
Мөккүһэри, күрэхтэһэри, эйэлэһэри, көрдөһөрү, аккаастыыры, сыыһа-халты туттары тулуйары үөрэниэххэ наада. «Иккини» ыллыҥ — сатаабаккын өйдөөтүҥ. Таптаатыҥ — аан бастаан үөрүүнү эбэтэр аккаастабылы биллиҥ. Этиһии кэнниттэн — сыһыаны чөлүгэр түһэрэргэ үөрэнниҥ. Дуоска иннигэр тахсан мух-мах бардаххына — элбэх дьон иннигэр саҥарартан куттанаргын биллиҥ. Атыннардааҕар ордук бырайыагы оҥордоххуна — урут сэрэйбэтэх дьоҕургун буллуҥ.
Онон, мин бүгүн, балаҕан ыйын 1 күнүгэр, оҕолорго «биэстэри» эрэ баҕарбаппын. Мин кинилэргэ үчүгэй учууталлары көрсөллөрүгэр, доҕордоһоллоругар, саатар биир дьиҥ доҕордонуохтарын баҕарабын. Туохха эмэ дьиҥнээхтик интэриэстэниэхтэрин баҕарабын. Оскуоланы бүтэрэллэригэр толкуйдуур, ыйытыыны биэрэр, сатамматаҕы тулуйар, араас дьону кытары алтыһар уонна саҥаны билэргэ баҕаларын сүтэрбэт буоллуннар! Пифагор теорематын умнубут да иһин.
Саҥа үөрэх дьылынан!
Сонун төрдө уонна хаартыска: Ил Түмэн пресс-сулууспата
-
0
-
0
-
0
-
0
-
0
-
0
